PHILIPSBURG, St. Maarten – Stuart Johnson, minister di Turismo y Economia di St. Maarten ta den luz negativo e ultimo dianan aki.
E minister en cuestion lo a retira un di su trahadonan, F.T., ora cu esaki no a acepta su avancenan sexual. Ambos tabata na Hulanda pa un bishita di trabao. E situacion a presenta ora cu Johnson y F.T. a bay casino despues di un dia pisa di reunionnan durante un biahe pa Hulanda. Placa destina como ‘daggeld vergoeding” durante nan estadia na Hulanda a bay perdi den gambling. Horanan despues, F.T. a pidi un prestamo personal for di Johnson. E ultimo aki lo a nenga y a indica cu e lo ta dispuesto pa yega na un acuerdo cu su trahado, pagando e resto di e estadia di F. T.
Johnson aparentemente lo a haci avansenan sexual, implicando cu esaki lo ta a cambio di placa. F.T. a bisa di no ta comfortabel cu esaki y a regresa St. Maarten, door cu e no por a paga su estadia mas.
REACCION JOHNSON
E minister en cuestion, Stuart Johnson tambe a duna su banda di medaya, caminda cu e ta indica cu “rednan social ta yena cu noticianan falso pa loke ta regarda mi persona”. Esaki el a bisa durante un Conferencia di Prensa di Conseho di Minister, refiriendo na acusacionnan di avansenan sexual pa cu un ex miembro di su staff.
El a bisa cu “mi a tuma nota di esaki, primeramente pa motibo cu mi integridad y caracter ta centro di calumnia. Ta un lastima cu e tipo di redonan aki ta sirbi como distraccion di e trabao cu ta wordo haci pa reconstrui economia di St. Maarten”. El a sigui bisa cu el a entrega un keho oficial dialuna ultimo. “E caso ta bou di investigacion y mi no ta den libertad pa duna niun informacion ariba e asunto aki. Mi tin intencion di sigui focus ariba e tarea di revitalisa e economia”, Johnson a bisa.