Den reunion publico di Parlamento ora cu gobierno a bin splica encuanto realisacion di presupuesto 2018 y kico el a haci pa baha gasto te cu awor por a conclui cu te ainda gobierno no a haci mucho.
Gastonan di personal envez di baha a subi cu 0.6%. Ta obvio cu e cantidad di contractanten cu a kita fo’i trabou a ser reemplaza cu otro personal di signatura MEPPORRED. Gobierno envez di menciona cumplimento cu promesanan haci a yora casi full e reunion encuanto 8 aña di nan den oposicion. Ministernan di MEPPORRED a uza tur sorto di nomber pa tilda gobierno anterior y a critica te hasta e exitoso Cumbre di AVP cu a lugar den fin di siman, sin papia di e parlamentarionan. Sra. Wyatt-Ras a haci preguntanan critico rond di diferente topico cu el a manda preguntanan caba pa ministernan di Asuntonan Social y Salubridad sin haya contesta. Pa loke ta trata politikeria di minister Glenbert Croes rond di e crisisplan social Wyatt-Ras a cuestiona cu e minister ta haci comosifuera ta dia cu nan a cuminsa goberna sector social a cuminsa existi. Cu no tabatin ningun plan ni maneho anterior y cu e lo a trece Unicef Aruba.
Segun Wyatt-Ras esaki no ta cuadra cu realidad. E plan social ta un proceso y continuacion di loke ya a ser haci den gobernacion anterior. Porfin minister Glenbert Croes a admiti cu na 2013 tabatin un integraal plan pa Hubentud titula “generation of leaders” y cu Unicef a haci investigacion na Aruba y cu e crisisplan ta parcialmente implementacion di e plan integral di Hubentud di 2013.
Asina mes e ta keda ripiti cu nada a sosode den sector social. Esaki ta un insulto pa tur esunnan cu a traha den e secor social. Segun Wyatt-Ras e minister ta den denial. Semper sector social a traha independiente y awor Wyatt-Ras tin e preocupacion cu gobierno lo tin 100 porciento di bisa den area social, locual lo ta desvantahoso. Pero e plan social ta pa 2 aña so, locual ta bisa hopi di e falta di vision di e gobierno aki. E gobierno a introduci un crisisheffing, cu ta ocasionando un crisis social y pesey awor nan kier crea un fondo pa maneha placa. E peliger ta cu e placa aki no lo bai pa esunnan cu mas tin mester di esaki. Dor cu e fondo aki no ta regla pa ley e control lo no ta garantisa.
Wyatt-Ras a enfatisa cu e ni su fraccion no ta contra di e plan di crisis. El a vota si contra di e presupuesto 2018 dor cu e tabata basa riba mentira. Gobierno a hinca e plan di crisis di carambola den e notanan di cambio di e presupuesto. Dicho notanan a ser cambia cantidad di biaha, hasta kier a kita placa bek for di crisisplan, locual Wyatt-Ras y su coleganan a stop.
Segun Wyatt-Ras dor di introduci crisisheffing gobierno a hinca man den cartera di nos hendenan, paso prijsnan di productonan a subi drastico y nos pueblo, en especial esnan cu menos placa den nan cartera, a drenta di berdad den un crisis.
Unda cu bo bai den supermarket nos hendenan ta keha cu placa no ta yega. Cu nan ta den un situacion dificil. Wyatt-Ras ta lamenta cu no tur su preguntanan na minister a ser contesta. Esnan cu si a ser contesta minister a haci comentarionan destructivo.