STA tin respet pa Aruba su organonan gubernamental y nos ministernan. Pero tin cosnan cu ta bayendo fout y mester par’e awo. Un minister su prioridadnan ta di busca solucion pa problemanan cu tin. Sr. Diego de Cuba, di sindicato STA ta splica.
E propio minister a programa un reunion pa diahuebs 14 di juni 2018. Pero un dia prome e ta manda un whatsapp, via di su coordinador, unda cu e ta bisa cu lamentablemente pa motibo di urgencia, e reunion no por bay door. E mas tristo ta cu e trahadonan a pidi dia liber pa nan bay reunion cu e minister. Pero riba un app, por mira Minister Chris Romero ta flankia, hunto cu minister Dangui Oduber, cual ta comprendibel cu ta di deporte, para dilanti di un poster di mundial di un compania local. Pregunta ta: unda prioridad di minister Romero ta? Tin un Arubus ta sangrando, tin Postkantoor cu ta den un estado deplorabel y mundial ta prioridad? Ta sigui mescos cu e gobierno anterior, cu prioridad robes atrobe ta trek dilanti cun’e, pa publicidad, pa show. Y cosnan asina ta indigna STA. E cosnan aki, STA no ta aceptabel. SI ta trata di un reunion cu caracter di urgencia, ta di compronde. Pero no cu ta cancela un reunion pa bay show cu Mundial 2018. Por compronde cu e ambiente ta festivo durante mundial, pero mester atende problemanan na nos pais. Nos problemanan no ta na Rusia, nos problemanan ta na Aruba. Nos companianan estatal cu ta cayendo den otro, ta na Aruba. Esaki ta e preocupacion di STA, y Sr. Diego de Cuba, no ta kita afo cu un ora pa otro por bin accion na Arubus.
STA ta fada caba di e wega di cashi pa muraya y di muraya bek pa cashi. Y loke minister Romero a haci cu STA, ta inaceptabel. Y ta mand’e un carta bisando cu esaki no ta aceptabel. Cosnan asina no por pasa mas.
Na mes momento ta buscando un director nobo pa Arubus, pero tanten e problemanan no ta bay. E minister tin tur e lista di preocupacion pa cu Arubus. STA ta hinca hopi tempo den e miembronan y e companianan cu nan ta representa y ta lamenta ora cosnan asina mester sosode. STA tampoco no tin’e facil. Nan mester saca tempo unda cu no tin, pa atende cun’e. Pero e hecho cu ta cancela un reunion importante, pa bay haci show, ta keda inaceptabel. E minister atende reunion cu SI tabata uno importante.
STA tabata hopi critico cu e gobierno anterior, riba e forma cu tabata haci uzo di compania priva pa hiba paketenan den departamentonan di gobierno, y no haci uzo di postkantoor, cu por a genera placa pa postkantoor, cual te ainda ta un punto di prioridad pa STA. A trece dilanti caba na minister y gerencia di postkantoor, cu si mester, lo bin cu accion na Postkantoor.
STA a tene un reunion di APFA tocante e areglo di pension, pa cu e trahadonan di Postkantoor. E 3% di su pensioen, y e 3% cu e doño di trabao, cual no ta yega cu niun donder. Cosnan aki mester waknan di mas cerca, esakinan ta prioridad pa nos pais. Cu e gobierno anterior a laga un desaster atras, ta un hecho. Pero si sigui asina, ta hib’e un tiki mas leu di loke e mester ta. Y esaki ta inaceptabel pa STA y lo zorg pa gara e toronan na su cacho, ya cu ta riparando cu cosnan ta canando schuins atrobe.