For di aña pasa, Minister di Deporte, Dr. Alex Schwengle hunto cu varios steakholders ta evaluando e posibilidad pa construi un asina yama “Multi-Functional Beach SportComplex” na Bushiri. E proyecto tin e potencial di bira uno grandi como tambe multi-funcional y ta na bienestar di e deportenan cu lo por practica riba santo blanco manera futbol di playa, beach tennis y beach volleyball. E compania profesional PriceWaterhouse Coopers ta haciendo dos tipo di estudio pa evalua na ki extento esaki lo ta bon pa Aruba teniendo na cuenta varios otro facilidad deportivo existente. E prome estudio ta un “Feasibility Study”, pa wak si e proyecto aki ta realisabel den e forma cu e lo mester bin y na e luga adecua, mientras cu e di dos estudio ta un “Social Economic Impact Assessment”, pa evalua e impacto socio-economico pa nos comunidad. Ta bon pa menciona cu e planificacion ta encera mucho mas cu simplemente un stadion pa deportenan di playa, principalmente e ta na beneficio di nos mucha y hobennan.
E proyecto riba su mes ta uno cu Minister di Deporte, Dr. Alex Schwengle lo desea pa bira un realidad y ta para completemente su tras. Di otro banda, Fundacion Lotto Pa Deporte a financia e proyecto di estudio aki den su totalidad, esaki na bienestar di deporte Arubano.
Mirando e popularidad creciente mundialmente di e tres deportenan menciona lo por atrae torneonan grandi y internacional pa Aruba, e asina yama Sport Tourism. Na varios ocasion por a presencia esaki na Aruba, y e ultimo torneo internacional di beach tennis tabata un muestra palpabel con hopi turista ta bishita nos dushi isla pa presencia un evento deportivo di playa.