“Mi ta sumamente contento cu e conferencia, cu e participacion, cu e organisacion y specialmente cu e contenido y e acuerdonan cu a sali na final di e conferencia aki”, asina Minister dr. Carlos “Alex” Schwengle a bisa na final di e ultimo dia di e conferencia di Health Care Conference Aruba 2017 cu a inicia diahuebs y a termina diadomingo den Hilton Aruba Resort & Casino. Esaki ta e di dos conferencia cu e mandatario ta organisa, cu ta conta tambe pa punto di acreditacion pa profesionalnan den cuido medico riba nos isla.
Dos aña pasa, na final di e conferencia a tene un encuesta bou di e participantenan y a sali afo cu nan ta desea bon oradornan, pa tin mas ehempel di “best practices”, cu a pone cu e biaha aki riba e di 3 dia a trece oradornan internacional cu a enfoca hopi riba cuido integral y a duna bista riba evidencianan y logronan di otro paisnan cu Aruba sigur por siña for di dje. Tabatin oradornan di Corsou y Aruba pa duna ehempel nan di programanan integral andando na nos islanan.
Diadomingo ainda e Ministernan di Salud Publico di Aruba, Corsou y Sint Maarten a firma un acuerdo, un “letter of intent” cu a nace for di un “Memorandum of Understanding” firma na 2015 caba. Lamentablemente a tuma hopi tempo, pa varios motibo for di alcance di Aruba, pa e demas islanan por a keda cla y firma e acuerdo final. Awor ta asina leu, despues di basta cambio den politica na nos islanan ruman, cu tin stabilidad pa por sigui y traha riba e acuerdonan aki. Mester bisa cu no ta solamente e islanan a firma na 2015, sino Hulanda tambe.
Den e acuerdo ta stipula cu e islanan lo sinta hunto como partnernan pa dialoga riba retonan y aspectonan den cuido y pa mira con por yuda otro a base di colaboracion cu ta promove un “win-win” pa e islanan. E base di e acuerdo ta pa traha hunto den un esfuerso pa reduci gasto y pa subi e balor di e servicio cu ta brinda. Den e letter of intent ta specifica algun area di e logronan cu kier concretisa den e siguiente dos añanan y concretisa e puntonan aki pa firma un acuerdo total dia 21 di juli proximo na Corsou.
Na final Minister dr. Alex Schwengle a enfatisa cu e “feedback” di participantenan ta masha positivo. Nan ta conseha pa no perde mucho tempo ta discuti solamente e meta unda ta bay, e vision unda ta bay como pais, pero pa no tarda mucho pa explora e “quick win” nan pa no stroba e iniciativa cu tin, e entusiasmo cu tin, e gana cu tin awor pa trece cambionan positivo, lo bay perdi.
“Esey ta por lo menos un di e consehonan y tur hende ta bisa pa pone mas atencion ainda riba prevencion, no solamente e di dos y di tres nivel, sino tambe den “primaire preventie”, pues no warda te ora tin enfermedad pa lamenta, sino pa haci mas ainda den evita cu hende ta haya enfermedad di presion halto, diabetes, obesidad, etc. Y un di e decisionnan pa yuda preveni ta pa cuminsa di jong, cu por ehempel e “gezonde scholen” pa bringa e cultura di comemento y bebemento cu tin riba nos isla, pues mester cambia nos custumbernan cu no ta saludabel. E problema ta pa cambia hende grandi ta dificil, cu mucha ta logra mas facil y mas lihe.
A base di e comentarionan expresa di e participantenan na final di e di dos conferencia di HCCA teni den fin di siman, lo evalua e temanan cu lo uza pa e di tres conferencia cu lo ta aki 2 aña atrobe.