Minister Ruiz-Maduro durante reapertura di Museo Arkeologico: MANA ta na vispera di un era nobo pa percura pa e existencia duradero

Despues di tabata cera pa mas cu dos aña Minister Ruiz-Maduro a logra habri Museo Arkeologico Nacional di Aruba (MANA) bek. Na luna di Augustus Sr. Pancho Geerman a wordo nombra como Director ad interim di MANA y durante di e periodo di tres luna a traha duro conhuntamente cu su team dinamico pa asina por a logra pa habri MANA bek. Durante su discurso Minister Ruiz-Maduro a anuncia cu MANA ta na vispera di un era nobo. Lo continua cu e proceso pa forma un fundacion autonomo pa percura pa e existencia duradero di MANA. E mandatario a informa cu International Council of Museums (ICOM) e aña aki a adapta nan definicion di museo, cu enfasis riba e tarea di multi-disciplinario di un museo. Banda di tur e tareanan cu un museo tin, museo ta duna un aporte tambe na desaroyo cultural, social y economico di un pais. E dignatario a participa cu pronto lo bay cuminsa traha riba un Maneho di Museonan, na unda lo bay involucra tur museo. Pa medio di e Maneho di Museo lo por bay traha na un forma mas structura y na bienestar di tur museo. Museo Arkeologico a demostra di por traha riba un nivel profesional y internacional pa logra un maneho sostenibel di nos herencia arkeologico. Minister Ruiz-Maduro a enfatisa cu cada museo tin e potencial pa contribui na un desaroyo duradero di nos generacion di awendia, pa nos hobennan por comprende nos pasado miho y pa nan por traha na bienestar di Aruba y un miho futuro pa nos pais. E mandatario ta contento cu Museo Arkeologico por habri su portanan atrobe, pa asina comparti historia di nos patrimonio nacional un biaha mas cu henter pueblo di Aruba y tambe cu un cantidad grandi di nos bishitantenan cu ta interesa den nos herencia arkeologico. Minister Ruiz-Maduro a gradici Tourism Product Enhancement Fund (TPEF) pa nan contribucion generoso pa MANA por a bira operacional atrobe. Tambe e mandatario a yama danki na Director ad interim di MANA, Sr. Pancho Geerman y e personal di MANA pa por a logra den un tempo record pa habri e exposicion permanente di nos Museo Arkeologico. E mandatario ta haci un invitacion na comunidad en general y especialmente nos studiantenan y tambe nos turistanan pa haci un bishita na Museo Arkeologico Nacional di Aruba.

Comments

comments