Minister di Transporte, Comunicacion y Sector Primario Chris Romero conhuntamente cu Santa Rosa y WEB a bini hunto pa un rueda di prensa cual nan a categorisa manera un atardi sumamente importante pa agricultura riba nos isla den cuadro cu firmamento di implementacion di tarifa adapta pa prijs di awa pa cunukeronan.
Awe tardi a wordo firma e acuerdo pa loke ta trata maneho di awa pa agricultura y criadornan di bestia na Aruba. Por corda cu na Maart 2018, un MOU a wordo firma pa traha un roadmap pa traha planes y idea na con por yuda nos cunukeronan produci awa, y stimula un otro pilar economico.
E percentahe di reduccion ta 40%. Cunukeronan cu tabata paga por ehempel 1000 florin lo spaar 40%.
Minister Romero ta bisa cu tin basta cunukero caba pendiente wardando riba esaki. Esnan riba 65 aña lo haya un despensatie pasobra Kvk ta un exigencia, y ta belastingvrij pa cunukeronan dus e registracion ta mas pa tin cosnan miho ordena. WEB tin un tarifa comercial cual ta 9,50 y e cunukero lo haya un tarifa flat di 5,50. Ta depende si un cunukero ta inscribi como un negoshi e lo paga 9,50, pero si ta uza un conexion comun di residencia lo depende e consumi, depende di cada cunukero ki tipo di instalacion e diferencia por ta mas cu 40%, lo por haya un reduccion substancial.
Di e cunukeronan 65 aña bay ariba tin manera 11 cunukero cu ta pendiente pa nan por bin na remarke y tin aña ta den agricultura. Tin 16 cunukero cu ta cla pa bin na remarke, y tin mas tambe cu ta haciendo tramitenan necesario pa yega na remarke.
https://www.facebook.com/masnoticia/videos/358490148904589/
Unabes bo ta registra, kico lo ta e consecuencianan? Na esnan cu tin e preguntanan aki, Minister Romero a subraya cu e ta al contrario, unabes bo registra bo ta haya beneficionan manera di importacion cu ta bira belastingvrij.
Minister Romero: “Mi ta kere nos debe ta pa nos informa esaki hopi mas pa nan ta na altura cu unabes bo ta registra, ta beneficio bo ta haya. E realidad ta cu e spanto aki ta wordo crea sin mester ta asina.”
E prome stap tabata esaki, y awor e siguiente stap gobierno lo bin cu cursonan pa esnan cu kier bay den e direccion aki di agricultura. “Tambe nos ta bezig cu World Bank pa purba wak por ehempel con nan por yuda nos pa haci estudionan, ki productonan lo ta bon pa cuminsa cultiva akinan na Aruba”, segun Minister Romero.
WEB su rol den e acuerdo
Pa un periodo largo caba ta trahando riba e proyecto aki y porfin a yega e dia pa realisa esaki segun director di WEB Luis Oduber ta bisa orguyosamente. Di parti di WEB ta importante pasobra nan lo por garantisa e parti di e calidad di awa cu e cunukero lo uza ta halto. “Nos a busca diferente alternativa pero na final nos a dicidi cu nos lo uza infrastructura existente y duna un prijs subsidia na e cunukeronan pa yuda den e desaroyo di agricultura y economia di aruba”, sr. Oduber a bisa durante rueda di prensa.
Unico exigencia cu WEB lo bini cu ne ta e colaboracion cu Santa Rosa, pa nan bira e wowo pa WEB pasobra nan tin e bista y conocemento di tur e cunukeronan manera tambe tur otro experticio pa yuda cunukeronan yega na nan meta. E exigencia di WEB ta pa pasa registra na Santa Rosa, unabes cu yena tur formulario, Santa Rosa lo pasa informacion pa WEB. Si tin meter existente nan lo wordo cambia y si tin mester meter nobo lo percura pa mira con lihe por cambia esakinan. Oduber: “E cooperacion t’ey sigur sigur di banda di WEB”
Ta pidi pa tin poco pasenshi pasobra si e cunucu ta poco leu di e liñanan existente, kisas e lo dura poco mas, pero si tin tuberia den cercania of meter actual, esaki por bay hopi lihe mes.