Minister di Transporte, Comunicacion y Sector Primario Chris Romero tabata den Parlamento pa duna informacion relaciona cu necesidad di inyeccion di capital den Post Aruba.
E mandatario den su disertacion a papia di e necesidad financiero cu Post mester di dje. For di 2005 e ta un N.V., cu su mesun statuut.
Den e caso aki, e mandatario a pone bon cla, no ta pidiendo Parlamento placa extra. E ta papia di e subsidio standard cu Post ta haya pa basta aña caba for di Gobierno, desde cu el a bira un N.V. E ta un suma cu ta hinca den e presupuesto caba, pero e problema ta sinta den e hecho cu presupuesto 2021 di pais Aruba no a wordo aproba ainda. Esaki ta e motibo cu e mandatario a bay Parlamento pa haya e suma aki pa Post N.V. por cumpli cu su obligacionnan, entre otro cu su empleadonan.
E empresa aki ta haya 3.8 miyon florin anualmente for di Gobierno, pero ta haya e pago aki den fase. E necesidad di Post na e momentonan aki, Minister a bisa Parlamento, ta un suma di 2.8 miyon florin. E suma aki ta hopi necesario pa por sigui opera. E mandatario a sigura cu e suma en cuestion lo wanta te cu luna di october mas o menos, cu nan ta spera cu pa e tempo ey ya caba e presupuesto 2021 ta aproba.
Tambe el a expresa su preocupacion pa si Post haya e placa aki, no verreken e suma cu loke empresa tin na debenan fiscal. “Esaki pasobra nan ta den negociacion pa yega na un areglo cu impuesto. No ta e idea cu nan ta haya e placa, y belasting ta bay cu ne.”
Post, manera ta e caso mundialmente, tin su retonan. Pero asina mes nan haci esfuerso grandi pa diversifica nan servicionan. E pandemia di otro banda a haci e situacion mas dificil pa operacion di Post N.V.
E reunion tabata un “bijeenkomst” pa cual no tabatin ningun decision tuma.