Durante su bishita na e parti di Karibe di Reino, Minister-Presidènt Dick Schoof a hasi un bishita di trabou riba Djadumingu 11 di Mei, na e Komandante di Forsanan Naval den Region Karibe (CZMCARIB), Komandur Walter Hansen.
Na Base Naval Parera na Kòrsou e Minister- Presidènt a haña informashon amplio tokante e tarea i responsabilidatnan di Defensa i Wardakosta den Region Karibe. Den esaki el a keda informá tokante presensia militar, operashonnan i kolaborashonnan ku sosionan di seguridat. E énfasis tabata riba e tenshonnan kresiente geopolítiko den region Karibe i e moveshon den direkshon di e promé tarea prinsipal di Defensa: protekshon di e parti Karibense di Reino. Durante e kombersashon tambe a diskutí tokante temanan aktual, tal manera kombatimentu di kriminalidat transfronteriso, yudansa humanitario i e ròl di Defensa den dunamentu di yudansa ora paisnan den Karibe pidi esaki
Despues di e informashon, Minister-Presidènt Schoof i Komandur Hansen a hasi un biahe kòrtiku na bordo di un Metal Shark di Wardakosta Region Karibe. Siguientemente a tene un konferensia di prensa na Base Naval di Parera, durante kua e Minister-Presidènt a enfatisá kon importante ta ku e fronteranan eksterior di Reino keda debidamente vigilá. Spesialmente den e tempunan aki di intrankilidat geopolítiko.
