Diadomingo mainta trempan a wordo planea di parti Departamento di Agricultura, Cria y Pesca Santa Rosa un bishita na diferente Pier di Piscado cu resorta bou di Santa Rosa. Nos seccion di Pesca cu ta Fundacion Centro di Pesca Hadicurari ta mantene e Piernan aki cu ta di gobierno. Hunto cu Minister President sr. Mike Eman, director di Santa Rosa sr. Nathalie Maduro, sr. Byron Boekhoudt cu ta chef di seccion di pesca y algun miembro di bestuur a bishita e Piernan aki.
A cuminsa parti pariba di Aruba cu ta e Pier di Rogers Beach. Aki Minister President Sr. Mike Eman hunto cu esnan encarga a yega pa asina tuma nota di e dañonan causa pa Horca Matthew algun luna atras. Scuchando e inkietudnan cu e Piscadonan tabata tin na e momento ey cu tambe tabata warda riba minister president su yegada. E vocero sr. Ernulfo Beaumont a combersa cu minister President sr. Mike Eman den nomber di demas piscadonan. Diferente inkietud a wordo treci dilanti y tambe diferente otro ideanan a bin dilanti pa un miho contribucion di parti esunnan encarga cu e Piernan y engrandece pesca en general aki na Aruba.
Despues di a bishita e Pier di Rodgers Beach a sigui pa esun di di Cura Cabay. Piscadonan for di trempan wardando e minister president Sr. Mike Eman pa asina tuma nota tambe kico tur nan tin pa trece dilanti hunto cu esunnan di Santa Rosa, seccion di Pesca y miembronan di bestuur di Centro di Pesca Hadicurari. Vosero di e Piscadonan di Cura Cabay Sr. Ruben Willems a combersa cu minister president. Sr. Mike Eman kende a pone tur puntonan di inkietud riba papel y haci entrega di esaki pa asina nan por haya oido di parti e mandatario. Un di e puntonan aki ta falta di luz cu nan tin na e Pier aki. Por a tuma nota tambe di mayoria trabounan cu ta andando pa e parti di construccion cu partinan nobo cu pronto lo keda finalisa.
Pier di Spaans Lagoen, Centro di Pesca Spaans Lagoen ta otro di e facilidadnan cu a keda bishita. Sr. Alex Farro vocero di e Piscadonan tabata presente pa asina duna di conoce na minister President sr. Mike Eman kico ta e ayudo cu nan mester na e pier aki cu no mucho tempo pasa a wordo renoba. Tin un parti cu no ta cai bou di gobierno di Aruba na e pier aki cu mester di mantencion riba corto plaso pa motibo cu un parti di e Pier a cuminsa kibra. Pier di Waf’i Rancho na Waf Chikito tambe a wordo bishitaRound. Na e Pier aki kisas kehonan no ta mucho pa motibo cu e Pier aki apenas tin un aña of kisas un poco mas cu el a wordo renoba. Sr. Clifford Rosa kende ta president di Fundacion Centro di Pesca Hadicurari a haci acto di presencia pa asina intercambia di ideanan pa un miho funcionamento di e facilidad.
E recorido a continua pa e Pier di Fundacion Centro Di Pesca Hadicurari. Sr. Byron Boekhoudt Chef di e seccion di Pesca brevemente a duna Minister president Sr. Mike Eman un splicacion di funcionamento di e Pier. Dañonan haci pa Horcan Matthew cu ya a wordo repara y manehonan pa uzo di e Pier ta algun di e splicacionnan cu a wordo duna.
Pa finalisa e recorido miembronan di e directiva di Fundacion Centro di Pesca Hadicurari a reuni cu Minister President Sr. Mike Eman evalua e peticionnan cu tabata tin durante e recorido y con esakinan mester bay wordo realisa.
Di parti di Departamento di Agricultura, Cria y Pesca Santa Rosa nos ta sumamente contento di por a realisa un recorido hunto cu Minister President Sr. Mike Eman pa asina mira kico ta “come y bebe” di e facilidadnan aki y duna atencion na nos Piscadonan.