DEN HAAG/ORANJESTAD – Recientemente Minister Plenipontenciario Guillfred Besaril a hasi un bishita cerca ing. Jossy Figaroa, director di Aruba Ports Authority (APA). Na e encuentro tambe tabata presente Roy Hart di Arubahuis y Sharon Erasmus di Arina.
E director di APA a duna nn presentacion amplio riba e desaroyonan cu tumando lugar na APA. Tambe ela spica cu APA a cumpra un tugboat nobo pa asina por garantisa servicio na e barconan cu ta drenta waf di Aruba. Pronto ehecutivonan di Port of Amsterdam lo ta na Aruba pa
reuni cu APA pa elabora riba ideanan nobo con por desaroya futuro di APA mas mihor posibel. Sr. Figaroa a splica cu e waf di Aruba mester keda bin cu innovacion pa por mantene un competencia den region.
Minister Besaril di su banda a bisa cu ta importante pa Cas di Aruba por mantene bon contacto riba e desaroyonan cu ta tumando luga na APA, pasobra Cas di Aruba tin relacion hopi bon mes cu varios companiannan Hulandes cu ta activo caba na Aruba manera Port Of Amsterdam, Iskes y Nirint Shipping.
Tambe e minister a toca e tema di studiantenan cu ta scoge pa nan estudio y despues di a termina di studia ta pasa dificultad pa haya trabao. Pa e motibo ey ta importante pa sigui e desaroyo di APA di cerca pa informa studiantenan riba posibilidadnan pa drenta den e mundo maritimo cu ta brinda oportunidadnan hopi interesante pa nan carera.
E reunion a bai den un ambiente hopi positivo y director di APA Jossy Figaroa a expresa su
satisfaccion cu e bishita di Minister Plenipotenciario Guillfred Besaril.