Den su prome declaracion despues cu a haci un inval den su cas, minister di asuntonan social, hubentud y labor, Paul Croes a comenta cu esaki ta momentonan cu hamas y nunca el a pensa di lo maak mee den su carera politico, pero siguramente algo cu a tuma hopi na serio na e momentonan aki.
El a agrega na esaki tambe cu na e momentonan aki, lo e no duna ningun declaracion esplicito riba e caso penal cu ta andando contra su persona y algun otro persona di su ministerio, pa motibo cu na e momentonan aki lo kier haya prome claridad riba e caso. Te na e momentonan aki no tin informacionnan concreto, ni tampoco abogadonan pa duna informacion riba esaki, pero ta considera e accion di autoridadnan hudicial, como algo hopi serio y ta tuma esaki completamente na serio y kier naturalmente duna espacio na ministerio publico, na autoridad pa haci nan trabao den un forma obhetivo, den un forma diligente y cu tur e prioridad cu nan mes tambe a informa cu nan lo ta haciendo cun’e den e presentacion anterior. Tin cu bisa banda di esaki cu e tin pleno confiansa den nos sistema hudicial. Nos sistema hudicial ta un di esnan mas fuerte den e region di Caribe y ta kere firmemente cu dunando e espacio aki ta importante pa asina ministerio publico por haci su tarea debidamente.
Bisando esaki, mustrando tambe riba e seriedad di e caso aki, awe mainta, despues di consulta cu algun consehero, cu famia, pero tambe cu coleganan minister di conseho di minister, Minister Croes a trece un proposicion cu un rato prome a keda aproba pa conseho di minister, pa asina e enfoke un biaha mas riba e caso cu ta andando, pero tambe pa duna espacio completo na autoridad pa por haci nan trabao, sin por tin ningun influencia envolvi, el a haci un peticion na conseho di minister pa un periodo di ausencia, pa motibo cu e caso aki na e momentonan aki no ta dun’e e espacio pa por continua cu e trabaonan, un periodo di ausencia unda cu e lo traspasa tur e proceso, proyectonan, maneho cu tin cu continua bao di e ministerio, na colega Angel Bermudez, kende ta e persona cu lo neem waar den e periodo di ausencia di minister Croes. E periodo aki ta un periodo corto te na momento cu ta prepara pa bolbe cuminsa activo den e funcion. Bisando esaki e trabaonan diario y e trabaonan activo di e ministerio ta wordo traspasa na e momentonan aki, despues di un decision di conseho di minister na minister Angel Bermudez, pa mientras tanto por enfoca tambe riba e caso, riba e trankilidad di e seno familiar, cu pa e minister ta hopi importante, pa por yega na e decision aki.
Minister Croes kier siguramente agrega na henter e declaracion aki tambe, un gradicimento grandi primeramente na Dios, na su famia cu tambe na e momento aki ta convivi e momentonan dificil aki, cu un biaha mas, hamas y nunca a pensa cu lo por ta den algo asina, pero kier duna tambe gradicimento na e comunidad completo cu a reacciona na un forma hopi optimista pa su persona y pa e procesonan cu semper ta salvaguardia, procesonan di integridad cu semper a salvaguardia, y mirando e momentonan aki, henter e desaroyo, e situacion serio aki, ta trece tambe un mancha riba e ministerio, pero tambe, riba e funcion di e minister di nos pais, riba Gobernacion tambe di nos pais, e miho opcion na e momentonan aki, ta pa distancia un rato for di e trabaonan diario y pa e gobernacion por continua, pa procesonan por continua. Durante e periodo di ausencia di minister Croes, lo tin un persona cu lo ta encarga pa continua cu esakinan y siguramente, gradiciendo comunidad y dunando tambe e garantia na nos comunidad, na sostenedornan, na pueblo en general, cu for di e reto aki tambe lo sali cu frenta na laira. Kier duna henter espacio, tur cooperacion posibel pa e investigacion andando. Un biaha mas un accion grandi, un accion cu ta tuma hopi na serio y pa tal motibo a yega na e decision, conclusion cu esaki ta e miho pa tuma na e momentonan aki.
Prome minister di su banda, el a menciona cu e dia di awe, mescos cu riba e dia cu a haya e noticia, ta sinti na prome luga, cual pa minister Croes y pa e famia y henter nos comunidad, no ta biba pa un momento asina, ta algo cu ta conmove profundamente. Pesey palabranan di hopi amistad y hopi solidaridad cu e minister y su famia, cu tin cu biba e momentonan dificil aki. A consider’e algo hopi corecto cu e minister a acerca conseho di minister cu un peticion pa ta ausente pa duna espacio na un proceso cu semper ta importante den un pais, caminda un orden legal, e estado di derecho ta para central, pa por duna for di Gobierno espacio di separacion di poder, tur e espacio cu e mester pa su trabao. Pa e motibo ey, den e dianan aki tambe, prome minister tabata tin combersacion, como tambe formador di Gobierno, cu coleganan minister y tambe minister Paul Croes, hunto cu fraccion di AVP, y den henter e proceso aki, a tuma sumamente na serio e situacion aki y for di e diferente combersacionnan y tambe for di e sentimentonan di minister Croes a sali e deseo pa crea e espacio aki. Cu su ausencia naturalmente tin cu tuma decision pa locual ta trata su cartera y den e decisionnan cu ya a wordo tuma anteriormente, na momento cu minister Croes ta ausente den casonan regular, minister di finansas ta esun cu ta reemplase y esey a confirma tambe den conseho di minister, aceptando e peticion di minister Croes pa ta ausente pa un periodo pa asina duna e espacio. Ta considera esaki un posicion hopi etico di e minister y ta contento di parti di conseho di minister cu Aruba, pa medio di e posicion cu minister Croes a tuma, pa medio di e posicion cu conseho di minister a tuma, por cada bes, duna ehempel, hasta den momentonan hopi dificil di kico ta e caminda corecto pa cana y irespecto e dificultad di e caminda aki y awe ta haci’e atrobe, a base di locual ta rigi moral, e sentido di etica y minister Paul Croes a demostra esaki cu e peticion pa tuma e espacio aki tambe pa nos sistema hudicial por cana, segun prome minister di Aruba, Mike Eman.