Drs. Paul Croes ta caracterisa como un Minister pro activo pa loke ta trata su carteranan. Tanto den Asuntonan Social, como Labor y Hubentud, semper ta buscando formula e iniciativanan cu ta enfoca riba participacion y avanse. Specificamente esun di Labor ta uno cu e Minister di mas hoben den Gabinete Eman ta maneha for di e punto di bista cu e no tey simplemente pa intermedia den conflictonan y haci inventario di e mercado laboral, pero activamente ta encurasha ciudadanonan pa reintegra na e forsa cu ta laga nos pais draai.
Pa medio di diferente programa y proyecto, e titular di Labor a bin ta stimula e mercado laboral for di diferente angulo. Un ehempel ta Expo Labor caminda ta trece trahado y dunado di trabou hunto no solamente pa yena vacaturanan, pero pa duna un bista di e oportunidadnan cu ta existi, como tambe di e hermentnan obtenibel pa subi e trapi di exito profesional. Den su prome edicion na 2016, Expo Labor a trece miles di persona hunto bou di un solo dak. E resultado positivo riba termino corto y largo a sigura e derecho di existencia y ta pesey Minister Paul Croes ta contento di anuncia cu den 2017 Expo Labor lo ta bek.
CITGO Desk ta otro ehempel di un manera dinamico con Gobierno a dicidi di tuma iniciativa den un situacion potencial di trabou pa hopi di nos hendenan. For di un principio, Minister Paul Croes tabata involucra den e negociacionnan cu e operador nobo di e refineria y a pone e interes di e trahado Arubiano na prome lugar. CITGO Desk ta fungi como un base di dato cu ta wordo scrutina pa sigura cu e trahadornan local capacita pa e trabounan necesario, ta esun prome yama pa yena e cupo den refineria.
Pa medio di proyecto ‘Ban Traha’, Ministerio di Labor a reintegra y rebaha door di varios ehercisio un cantidad di casi 500 persona. A studia di manera individual e caso di personanan sin trabou y cu ta haya sosten financiero publico. A traha cu cada un pa asina surpasa e retonan social o di capacidad y den cooperacion cu sector priva, a busca un cupo di trabou pa cada un. Ademas di reduci e presupuesto di Pais Aruba considerablemente, tambe a duna e personanan en cuestion, un sinti nobo di balor propio y proposito den bida.
Adicional na e facilidadnan ariba menciona, Minister di Labor, drs. Paul Croes tambe ta traha riba Programa di Certificacion, cual ta un trabou conhunto cu instancianan local y ta ofrece e Vacature Bank Online cu ta yuda no solamente nos profesionalnan den exterior, pero na Aruba tambe, pa monitorea e oportunidadnan di trabou cu ta presenta.
Di e manera aki Ministerio di Labor ta aporta substancialmente na un reduccion constante den e cifra di desempleo riba nos isla, na e crecemento economico di pais y na un miho calidad di bida pa e ciudadanonan di Aruba.