Minister di Asuntonan Social, Hubentud y Labor drs. Paul Croes a expresa su palabra di felicitacion na e organisacion local di YMCA pa cu e nombracion di directora nobo Rachel Croes. “Sigur un persona hopi profesional y kende nos a recomenda na directiva di YMCA como un persona bon prepara,” asina Minister Croes a indica.
E mandatario ta hopi contento pa e manera con e proceso di vacatura, seleccion y nombracion a bay na YMCA ya cu esaki ta un organisacion cu ta cumpli cu e criteria y vision cu Gobierno tin pa e hobennan di nos pais. “Un fundacion cu semper a cumpli cu e criteria di contaibilidad y ta entrega jaarrekening semper na tempo; pero tambe cu tur e proceso administrativo na su luga.”
Minister Paul Croes ta convenci cu e nombracion di e director nobo ta duna un impulso na e trabounan cu YMCA ta haciendo. YMCA ta organisa diferente actividad den dos di e districtonan mas grandi di nos comunidad. “Ohala den futuro nos por papia di un di tres YMCA pa asina por cubri mas cu e trabou importante cu nan ta haciendo,” e titular di hubentud a remarca.
Por compara e organisacion aki cu Fundacion Pa Nos Muchanan cu pronto ta contando tambe cu un director nobo. Por bisa ademas cu tur e fundacionnan cu Gobierno ta duna subsidio pa nan por sigui haci nan trabou, ta cumpliendo cu e reglanan y e meta di forma un generacion di lider den nos sociedad.
Minister Paul Croes a finalisa deseando Rachel Croes y henter e directiva y personal di YMCA Aruba hopi exito den nan proyectonan dilanti porta y confirmando cu por sigui conta cu e apoyo di su dje y su Ministerio.