Den fin di siman Minister di Asuntonan Social y Hubentud, drs. Paul Croes a asisti na e celebracion di aniversario di plata di Fundacion Pa Nos Muchanan. Na e ceremonia Minister Croes a felicita, pero tambe gradici directiva y personal di e fundacion pa un trayectoria asina importante den formacion di varios generacion di ciudadano.
“25 aña no ta ayera, ta 25 aña cu bo ta dedica na nos muchanan den nos sociedad. Ta nifica cu e fundacion aki a dedica tempo, energia, fondo y organisacion. Nos ta felicita e fundacion pa e trabou importante cu nan ta haci y apoya nan como Gobierno den e rol di cuida, proteha, informa nos sociedad den un forma preventivo, apoyando mayornan den e forma con nan ta lanta nan yiunan,” Minister Croes a expresa.
Directa of indirectamente Fundacion Pa Nos Muchanan a y ta hunga un papel importante den tur hende su bida. Sea pa medio di cursonan di educacion y guia pa mayornan, of pa atrabes di nan sosten na centronan di cuido, e organisacion ta brinda e hermentnan necesario pa e desaroyo, proteccion y educacion di nos muchanan.
Minister Croes ta elogia e escogencia cu e fundacion a haci pa dedica e celebracion aki na e lider di centronan di cuido di muchanan na Aruba. “Esey ta un gesto masha importante pa motibo cu Fundacion Pa Nos Muchanan a sali for di e seno aki. E importancia di e centronan di cuido den e desaroyo di e muchanan, den nan proteccion, den nan salud, den proteccion ta keda algo masha importante pa resto di nan bida.”
Awe mas cu nunca Minister Croes ta balora e trabou di Fundacion Pa Nos Muchanan cu, hunto cu varios otro fundacion pero tambe cu departamentonan di gobierno, ta esnan cu ta bringa tur dia pa proteccion di nos yiunan, salud di nos yiunan, desaroyo di nos yiunan y educacion di nos yiunan. “Nos pais ta bendiciona di por tin un Fundacion Pa Nos Muchanan. Mi palabranan no ta solamente di pabien, pero danki pa e inversion cu nan a duna ultimo 25 añana tur e muchanan.”