For di 1992 Nacionnan Uni a declara dia 3 di December como e Dia Internacional di Persona cu Limitacion. E meta di e dia aki ta pa promove e responsabilidad di paisnan pa brinda proteccion y oportunidad, entre otro aspectonan, na e personanan cu limitacion sea fisico of mental. Esaki ta un causa cu ta hopi cerca di Minister Paul Croes, kende durante henter aña ta pendiente di e interesnan di e grupo aki den nos comunidad. Pa aña 2016, e titular di Asunto Social y Labor ta pidi pa henter nos pueblo reflexiona riba e papel cu nos ta hunga den crea un miho ambiente pa nan tur.
“Awe nos ta para keto riba e fecha aki pa como pais bo mira unda bo ta para pa cu personanan cu limitacion den bo sociedad, con bo ta percura pa nan, con bo ta respeta nan derechonan, con bo ta prepara infrastructura pa nan, con bo leynan social ta na bentaha di e personanan aki.”
Como Minister di Asunto Social y tambe di Labor, un di Minister Croes su metanan principal ta pa mira mas inclusion y menos descriminacion pa persona cu limitacion den nos sociedad. “Nos mester kibra e taboo; nos mester acepta e personanan aki como individuo cu ta agrega algo positivo na nos pais, sea den deporte, sea riba tereno cultural, sea riba tereno social of laboral.”
E yamado cu Minister ta haci ta pa comunidad pa tin mas respet pa e personanan aki cumpliendo cu nos balornan humano, pero tambe cumpliendo cu tratado y leynan cu nos ta biba cune den e sociedad.
Minister Croes ta kere cu esaki tambe ta un dia cu nos ta para keto y pone atencion na tur esnan cu ta cuida y apoya persona cu limitacion den nos sociedad. Ta trata di e persona na un fundacion, na hospital, na cas, pero tambe e por ta un persona na pia di trabou cu ta apoya un persona cu limitacion.
“Nos pais mester ta un ehempel pa otro paisnan den region na unda cu nos si ta respeta e derechonan humano di persona cu limitacion; nan ta forma parti di Aruba,” Minister Croes a declara. Rond di 8 mil persona tin un of otro limitacion y esey ta motibo suficiente pa “nos tur hunto sigui traha mas riba e meta pa inclui nan mas y descrimina nan menos den e desaroyo di nos pais.”