Durante e tratamento di e Codigo Civil den Parlamento di Aruba, Minister di Husticia a entrega un nota di cambio pa asina su persona, despues di scucha y evalua opinion di Ministernan di Asuntonan Social y esun di Salubridad, apunta un instancia central pa registro di abuso di mucha na Aruba. Esaki sigur ta otro paso importante den e lucha pa mehora e atencion y proteccion di e victimanan di abuso sexual of fisico na Aruba.
Un punto di coordinacion central, manera e nota di cambio ta trece dilanti, ta cumpli tambe cu e mocion di Parlamento di Mei 2015 unda unanimamente ta propone pa apunta Bureau Sostenemi como e punto central aki. Tambe e cambio aki ta tuma e recomendacionan di Unicef pa re-enforsa e rol di e departamento aki den e cadena di cuido.
Minister Paul Croes ta kere cu e paso aki ta hopi importante pa asina finalmente yega na un “Nationale Meldcode” ainda prome cu e ciere di 2016. Paso pa paso ta mira mehoracion den e proceso di proteccion, cuido, salud y desaroyo social di nos muchanan. “Nos no ta cla ainda, pero tur dia nos ta haci pasonan positivo padilanti. Hunto cu e veld nos lo sigui traha pa nos yiunan no pasa mas den e casonan devastador aki”, Minister Paul Croes a anuncia na fin di e reunion.