“Nos a haya varios recomendacion valioso cu lo wordo inclui den e programa di certificacion pa e sector energetico y e refineria y nos lo inclui tur esaki den e programa. Esaki lo haci’e un programa mas completo y na beneficio di nos hobennan”, minister Paul Croes a mustra durante encuentro cu e sindicato y contratistanan di e refineria. Desempleo bou di hubentud ta keda un preocupacion y sigur e meta pa Minister Paul Croes ta pa disminui esaki. Den un encuentro na TNO siman pasa unda varios contratista a sinta cu e Comision institui pa Gobierno pa ehecuta e Programa di certificacion pa e refineria varios recomendacion y ideanan a sali padilanti con pa mehora e programa. “Mi tin pleno confiansa den e team cu lo duna nos conseho. Ta trata di hendenan di varios sector cu ta trahando hunto cu un meta y esey ta crea un programa miho posibel pa hobennan por ta miho prepara pa traha den e refineria”, minister Paul Croes a bisa den un entrevista na final di e encuentro. E programa aki lo ta dedica na hobennan cu termina EPI, EPB, Openbare Avondleergangen y SPO cu ta scolnan tecnico.