“Mas participacion di riba e mercado hobennan cu no continua cu nan estudio of termina nan estudio ta keda mi meta principal. Como Minister di trabou un termino central den mi maneho ta Participacion. Tur iniciativa cu mi bin cune ta cu esaki na mente. Trabou ta dunabo stabilidad financiero, oportunidad pa desaroya bo talentonan, crea un network mas amplio y crece como individuo”, minister Paul Croes di labor a informa.
Desempleo bou di hubentud na aña 2008 tabata 28%. (cifra census 2008). Na 2015 esaki ta na 18%. Mas participacion di hobennan riba e mercado laboral ta significa un aumento di productividad. Un aumento di productividad automaticamente den desaroyo economico pa bo pais. Cu e balor agrega cu hobennan ta trece na e mercado esaki lo significa cu lo tin mas placa den circulacion, mas entrada pa caha di gobierno y mas comercio. Programanan manera Expolabor, Ban Traha, Refinery Certification Program, Online Vacature bank y DPL Arbeidsbemiddeling ta ehempelnan di formanan cu empleo bou di hubentud ta keda stimula. “Mi ta premira un caida mas grandi pa 2017 pa locual ta desempleo bou di hobennan na Aruba. Locual mi ta mira ta cu tin mas hobennan cu ta sigui scol locual ta positivo. Entre 2013 pa awo nos a mira un reduccion den e cifra di desempleo bou di hubentud y esaki nos lo sigui impulsa esaki”, minister Paul Croes a indica. (23.6% – 2013/ 22.5% – 2014 / 18.2% – 2015). Minister Paul Croes ta kere cu e aspecto social cu kisas ta un estorbo pa hopi hobennan mester wordo poni atencion riba dje. Den preparacion pa un programa nobo lo pone mas enfasis riba e parti social pa asina facilita mas hoben na trabou.