“Cu nos futuro generacion na mente nos a bin riba e iniciativa aki pa garantisa trabou di nos hobenan den e sector energetico di nos pais. Asina garantisa cu nos juinan di tera por tin un porvenir aki na Aruba”, Minister Paul Croes di labor a bisa na final di e prome encuentro cu e Comision di e programa di certificacion pa e sector energetico di Aruba. Minister di labor drs. Paul Croes a reuni cu e Comision institui pa Gobierno di Aruba pa asina prepara un conseho pa Gobierno pa locual ta e certificacion technico pa e refineria y tambe e sector energetico. “Un reunion hopi interesante y sigur fructifero. E expertonan aki prepara un plan y tambe recomendacionnan pa institui e scol tecnico pa hobennan cu ta haciendo Openbare Avondleergangen, EPB y EPI sector tecnico”, Minister Paul Croes a duna di conoce. Representantenan di Ministerio di Educacion, Ministerio di Energia, Ministerio di Asuntonan General, e Ministerio di Labor y tambe expertonan di e team di negosacion di Aruba ta esnan cu lo prepara e conseho aki pa Gobierno. E Comision lo tin 2 luna pa asina presenta e propuesta na Gobierno pa asina implementa e certificacion aki. “Aki nos ta crea un base pa nos hobennan y tambe personanan desemplea na Aruba. Hobennan cu cierto experticio tecnico lo por asina haya trabou den e refineria, garantisando asina cu nos futuro generacion ta sigura di un empleo den e sector energetico di nos pais”, minister Paul Croes a mustra.