Diahuebs anochi e palabranan di Minister Paul Croes na ceremonia di apertura di MFA Paradera, a sigui e presentacion di cantante Jeon interpretando, entre otro, e tema ‘Celebra’. E titular di Asuntonan Social, Hubentud y Labor a tuma esey como su inspiracion expresando cu en berdad tin hopi di celebra. “Nos ta celebra cu e servicio ta yega mas cerca di tur e ciudadanonan di e dushi districto di Paradera.”
Su tras Minister Croes a bisa cu “ta celebra e hecho cu ciudadanonan por sinti cu nan ta parti di e bienestar di nos pais. Algo cu sigur nos ta celebra ta un vision pa calidad di bida den henter nos pais cu e lista largo di mehoracion y proyectonan den barionan y awe ta celebra otro joya di edificio cu ta e MFA Paradera. Sigur awe nos ta celebra tambe talento, experticio, union di trabou pa por realisa algo bunita, elogiando e trabou di arkitecto Jouel Croes y Bureau MFA.”
Na su opinion, e bario aki ta importante pa nos pais pa e cantidad di ciudadano cu ta biba aki y pa e desaroyo economico cu e ta conociendo, ta haya un joya di edificio cu un arkitectura cu ta capta henter e sentido di Paradera, cu a tene cuenta cu varios aspecto pa asina e pas cu e infrastructura y e cultura cu e personanan di e bario.
“E vision aki ta sali di un persona cu a dedica su mes no solamente na sinta patras di oficina y duna ordo, pero cu ta bay den e bario, combersa cu e ciudadanonan. Practicamente con pueblo ta co-goberna cu Gobierno,” e mandatario a comparti cu e publico presente na e apertura.
Pa conclui, Minister Paul Croes a rindi honor na Sr. Mito Croes bisando cu e recien fayeci politico y baluarte di e bario “a dedica su amor na su famia, su humor na su amigonan y conocinan y el a dedica su sabiduria na engrandece e pais aki. Y ki mas bunita gesto pa cariñosamente dedica e edificio aki? Un aplauso pa Mito por scuch’e te den shelo. Asina nos ta duna homenahe na e gran maestro aki.”