Minister di labor ta lamenta cu e parlamentario cu a trece mal informacion cu a cuminsa tuma hende di afo pa traha den Citgo no ta berdad. Minister Paul Croes a splica cu na e momentonan aki, manera cu nos comunidad ta mira, a inicia un proceso caminda cu ta cuminsa tuma tur e curriculumnan di nos hendenan local. A menciona esaki na mas cu un ocasion. Croes ta minister di labor di Aruba y e ta para na interes di e trahado di Aruba. Na e momentonan aki ta ricibiendo masha hopi persona cu ta solicita pa un trabao den e refineria, sea directamente of sea por medio di un contratista, na e momentonan aki, tin combersacionnan ta andando tambe cu gerente general di Citgo Aruba, sr. Alirio Zambrano, kende ta preparando pa haci un peticion na Citgo Desk pa ricibi un cantidad di trahado local cu ya caba a haci un tipo di screening pa mira nan añanan di experiencia, nan specialisacion, mira si nan a yega di traha den e refineria caba y tur esaki ta mandando pa e compania, den e caso aki Citgo, cu finalmente ta bay tuma decision final ken nan ta apunta of no na e trabao. Tin areglo di 80/20 pa loke ta trata Citgo. Esaki ta firma y den e Labor Regime aki ta poni cu 80% di personanan cu ta traha directamente den e refineria mester ta hendenan local. E resto di 20% ta wordo otorga na personanan den posicionnan di confiansa pa locual ta trata e refineria pa nan mes, pero tambe den e 20 nan aki tin cierto regulacionnan tambe cu nan mester cumpli cun’e pa por yega na e 20% aki. Fuera di esey tin cu bisa 2500 pa 3000 cupo di trabao cu lo habri na momento cu e refineria realmente bay ta cuminsando trabaonan di rehabilitacion, mester menciona e caso aki, mientras cu tin trahadonan local, no lo ta dunando permiso pa personanan di afo bin y haci e trabaonan cu nan lo mester haci. Ta premira si cu lo mester duna cierto permisonan pa personanan di afo bin, pa motibo cu no tin e totalidad di trahadonan na Aruba, pero kier garantisa, reitera un biaha mas, manera cu a haci siman pasa tambe den Parlamento, cu e ta minister di labor di Aruba pa hendenan local, prome. Na momento cu esakinan agota, lo ta buscando den e caso aki contratistanan, Citgo lo ta buscando personanan di afo pa bin y yena cierto vacaturanan cu tin ainda.