Minister Paul Croes durante su ultimo bishita na Fundacion FUNARI a bisa cu e lo inicia un campaña di conscientisacion nacional pa asina pone enfasis riba e grupo grandi di personanan cu un of otro limitacion y riba nan derecho. Nan derecho pa trato igual, pa respet y pa por funciona y participa den un forma activo den nos comunidad. Durante tratamento di e Codigo Civil den Parlamento un luna pasa durante su discurso Minister Paul Croes a mustra riba e hecho cu tur nos ciudadanonan tambe esnan cu limitacion fisico of mental mester por desaroya nan mes optimal den nos sociedad. Minister Paul Croes ta spera cu e mes un forsa y energia cu a lucha pa igualdad den e ultimo lunanan, tambe corda riba nos hendenan mas vulnerabel fisicamente. “Mi lo reuni cu e cantidad di partnernan cu ta dedica na e grupo vulnerabel aki. Ta un cantidad di expertonan cu ta dedica aña aden aña afo na mehora e calidad di bida di nos ciudadanonan special”, minister Paul Croes a anuncia. E plataforma pa personanan cu limitacion ta un plataforma unda varios organisacionan ta wordo representa. Organisacionan manera FAVI, FEPO, FUNARI, SVGA, Ambiente Feliz, Trampolin Pa Trabou, SONRISA ta algun di e fundacionan cu ta resorta bou di e maneho social pa locual ta e grupo special aki. Minister a anuncia di kier impulsa un campaña nacional pa asina mustra comunidad completo riba e balor y derechonan di ciudadano nan cu tin un of otro limitacion. E grupo aki ta consisti di alrededor di 8000 persona den nos comunidad.