Den un carta dirigi na Hubert Dirksz di FTA alabes Presidente di Union Sindical, Minister Paul Croes di labor a informa sr. Dirksz cu pa falta di consensus riba e cambionan den e articulo 1613x, e lo no propone cambionan den e reunion pa trata Codigo Civil. Tabata un proposicion cu e Minister a manda pa amplia e articulo aki pa dos grupo special. Uno tabata pa personanan cu limitacion por haya e oportunidad pa contratonan pa tempo difini y tambe hobenan cu ta den un trayecto di re-integracion riba e mercado laboral. Ta dos grupo cu dificilmente ta hayando trabou y pesey Minister a propone e cambionan aki. Banda di hopi cambio cu si tabatin consensus, esaki no a logra haya e apoyo di sindicatonan. “Nos tabatin contacto cu e presidente di e sindicato y a mustra cu no por a logra haya e consensus riba e cambionan proponi. Y mi a bisa sr. Dirksz prome cu nan encuentro cu mi lo no haci ningun cambio sin haya e apoyo di sindicatonan. Esey mi a confirma sr. Dirksz den e carta tambe”, minister Paul Croes a mustra. Den e tratamento di e Codigo Civil lo tin bastante cambionan cu lo keda presenta na Parlamento. Minister Paul Croes a mustra cu lo keda den dialogo cu sindicato y gremionan comercial pa mira den ki forma por yuda hendenan cu limitacion haya mas puesto riba e mercado laboral. Tambe hobennan cu haya nan mes den problemanan social mester un extra push pa por haya un oportunidad pa traha. Den e tratamento dia 8 awo Minister a informa e sindicatonan cu lo no propone e cambio specifico aki pa falta di consensus.