Segun minister di Labor, pa hopi aña tipo di programanan di estimulo pa nos hobennan no a wordo incorpora mas den refineria. Esaki ta algo nobo cu Gobierno kier introduci. Ya caba tabata tin algun reunion unda cu e comision aki a reuni, biniendo cu un proposicion y recomendacion pa Gobierno, con por bay institui esaki, Ki cantidad di hoben nos tin prepara pa bay haci e programa aki. Con largo e certification program ta tuma luga, den ki acuerdo ta yega na dje pa Citgo cover gastonan di e programa aki y con garantia e hobennan aki tin pa bay traha den e refineria. A reuni cu e sindicato di Valero den e caso aki, muy probablemente lo tin representacion nobo den Citgo, como sindicato pa e trahadonan. Pa nan tambe por duna un feedback den ki forma por apoya esnan local mas miho den esaki. Kiermen cu tin combersacion cu diferente instancia relevante, pa loke ta Citgo. Tin e databasenan separa, cu no ta database cu ta den otro. E personanan cu ta aplicando di exterior, ta den un database poni apart y esunnan local ta den un otro database apart. Awor aki loke ta wordo haci, ta trahando seleccion di tipo di trabaonan cu cada un trahado tin. Cada un persona tin cierto experticio y esey ta locual ta haciendo awor aki.
Contratistanan
Mescos cu refinerianan anterior, entre nan Coastal, El Paso y ultimamente Valero, contratistanan tabata haya un periodo di 11 luna pa un turnaround di un planta of di cierto areanan di refineria. Den e caso aki e ta bay ta igual. Rehabilitacion ta bay ta un periodo maximo di 2 aña, pero rehabilitacion di cierto plantanan lo bay ta den menos tempo.
E ora e permiso cu e personanan aki ricibi pa cierto proyecto lo ta mara, pero tambe mara na cierto tempo, den un maximo di 11 of 12 luna, conforme protocol cu lo ta cerando cu Citgo.
Eventualmente si e compania aki tin mas proyecto pa continua cune den e refineria, nan lo por haya un extension pa caba cu e proyecto ey. No ta asina cu e cantidad di 1000 of 1500 cu ta bin pa e rehabilitacion lo permanece na Aruba.
Yamado na e clase trahado
Croes ta haci un yamada ta pa gara e oportunidad aki. Ta un oportunidad unico pa kisas cambia di trabao of cuminsa un trabao den e refineria of reanuda bo trabao den refineria, como cu bo ta un persona cu a traha eyden caba. Tuma esaki den un forma responsabel. Sea hopi responsabel cu e iniciativa nobo aki, e paso nobo aki cu kier tuma den bo carera. Tuma e responsabilidad aki cu ta uno cu ta bin cun’e pa motibo cu esaki a scucha tambe for di e sindicato IOWA, unda cu nan a bisa cu e iniciativanan ta bon, pero ta importante pa e trahado mes cumpli. Esey naturalmente ta un yamada cu kier haci siguramente na e comunidad, pa gara e oportunidad aki cu dos man. Wanta na dje y Gobierno, lo kier apoya cada un den e proceso aki pa por yega finalmente na un empleo fiho, stabilidad financiero y como cu e refineria ta conoci riba e mercado laboral, ta paga mas miho cu e sector eyfo, ta bisa cu e incentiva financiero aki naturalmente ta algo cu mester tene cuenta cune, segun minister Croes.