E siman aki Feria Social 2016 ta brinda Aruba e oportunidad di atende un evento unico den su estilo, algo cu probablemente no lo ripiti mas y cu ta sumamente importante pa laga nos realisa tocante e importancia di cuido di nos bista, compronde pa otronan cu no tin nan bista mas y con importante ta pa yuda otro. Como parti di e proyecto di Ministerio di Asuntonan Social, Hubentud y Labor hunto cu CEDE Aruba, e Fundacion Arubano pa esnan Visualmente Incapacita a yega na e fondonan necesario y e ayudo boluntario pa realisa un ‘Dare The Darkness.’ Esaki ta un cena caminda e invitadonan lo ta den total scuridad.
Dylan Farro, como Youth Coach di Feria Social pa FAVI ta conta con nan a bin ta prepara pa e actividad aki cu ta bay tuma luga dia 25, 26 y 27 di Augustus proximo na un luga conoci solamente pa esnan cu a keda invita of ta bay cumpra carchi pa e evento. Adicional na e conscientisacion, tambe ta sirbi pa recauda fondo pa dos hobencita local cu ta visualmente limita y asina ta yuda nan pa yega na e ekiponan necesario pa nan por atende scol mescos tur otro mucha.
Minster Paul Croes ta elogia e ekipo di trabou cu a haci hopi uso di mercadeo online y social media, no solamente pa a yega na e boluntarionan, pero tambe pa mercadea e evento y haya e participantenan desea. Participacion na e cena aki ta na balor di $100. Un cantidad limita ta obtenibel pa publico, mientras cu otronan ya caba a ser bendi pa medio di invitacion dirigi personalmente.
Sari Wernet, terapista di revalidacion di FAVI ta conta cu e actividad di ‘Dare The Darkness’ ta algo conoci na hopi otro pais rond mundo. E mes a yega di experienci’e na nos isla ruman di Corsou y esaki sigur a haci un impacto grandi den con e ta wak esnan afecta pa falta di bista y den su vocacion pa yuda nan. E tabata un deseo di FAVI cu tabatin seis aña warda den lachi, pero pa motibo di financiamento no por a realisa prome y ta danki na Feria Social a obtene e fondonan necesario.
“Aña pasa caba FAVI tabatin un bon experiencia cu Feria Social caminda por a adkiri material didactico pa e muchanan y cu esey den mente a acerca Feria Social pa realisa e proyecto cu semper nos kier a haci,” Sra. Wernet a comenta. Dare the Darkness ta papia di tin e durf di afronta loke hendenan ta ciego ta biba dia aden y dia afo. Conscientisa riba e importancia di cuida nos bista mes importante cu ta bishita un dentista.
Minister Pau Croes ta invita tur esnan interesa pa atende e cena extraordinario aki por tuma contacto cu FAVI na 582-5222 of 5825051, of tambe riba Facebook na FAVI Aruba. “E ta un experiencia unico. Un bes bo bib’e nunca bo ta lubid’e. Bo ta compronde e persona cu limitacion visual mas. Abo tambe por contribui na e conscientisacion, na educacion di otronan y na esnan cu no tin e habilidad cu otronan tin,” e terapista di FAVI a finalisa bisando.