Como titular di Asuntonan Social, Minister Paul Croes conoce di cerca e situacion cu hopi famia na Aruba ta enfrenta diariamente. Sea pa un motibo of otro, conciudadanonan ta den desbentaha pa afronta e deber di carga un hogar y famia. Hustamente pa e motibo aki, Minister Croes ta combenci cu e beneficionan adicional anuncia, como parti di e pakete ‘Prosperidad Comparti,’ ta un ayudo enorme cu miles di Arubiano ta ricibi cu brasa habri.
Actualmente e ‘normatieve bijstand’ ta brinda na e ciudadano mas vulnerabel un entrada pa luna di 407 Florin. Cu entrada di proximo aña, e suma ey ta incrementa te na 450 Florin. Pa aña, e diferencia aki ta suma na mas di 500 Florin. Fuera di esey tin e Schoolkinderentoeslag introduci pa Gabinete Mike Eman I cu ta otorga 200 Florin pa cada mucha cu ta bay scol. Esaki tambe a conoce un aumento di 50 Florin, cual anualmente ta representa 600 Florin extra.
Miembronan di famia riba bijstand tabata ricibi te cu aworaki, 175 Florin pa luna. Gobierno di Aruba a dicidi pa aumenta esaki na 200 Florin. E aumentonan aki ya caba ta nifica un miho calidad di bida pa e Arubiano riba asistencia social. Adicionalmente mester conta loke nan y tur otro famia riba nos isla ta bay spar na momento cu e tarifa di coriente conoce un reduccion di 15%. Esaki lo ta efectivo na januari 2017.
“E reduccion di tarifa di coriente cu 15% cu e compensacion adicional pa nan entradanan ta representa un ‘dobbel win’ pa e personanan cu ta den e situacion aki,’ Minister Croes a expresa. E mandatario ta sumamente contento cu e beneficionan ta bin danki na un maneho responsabel di finanzas publico y e vision pa comparti e avansenan cu e comunidad di parti di tur su coleganan den Gabinete Mike Eman II.