Dialuna mainta Minister Paul Croes a bishita fundacion Ambiente Feliz na Santa Cruz despues di nan exitoso participacion na Feria Social 2016. E fundacion aki ta uno cu ya caba ta bay celebra 30 aña di existencia riba nos isla y cu tin metanan special di cuida esnan cu limitacion y duna nan e apoyo 24 ora pa dia. E fundacion aki sin duda algun ta haci un bunita trabou pa nos comunidad y cu merece e apoyo y elogio pa asina por continua cu e trabounan aki. Fundacion Ambiente Feliz pa di dos aña a participa na Feria Social y a logra traha un Snoezel ruimte pa duna nan clientenan terapia y tambe lansa nan Website. E fundacion a haya ayudo di 8 hoben boluntario pa por realisa e proyecto y ta contento cu esaki a bira un exito. Minister Croes di su banda ta sumamente satisfecho cu e resultado cu Feria Social a trece cune pa e fundacion y ta duna di conoce cu den futuro Gobierno lo sigui apoya e fundacion cu un apoyo mas structural pa asina continua cu e bunita trabou cu e fundacion ta haci pa nos comunidad. Pa finalisa Minister Croes kier a gradici tur esnan cu a yuda e fundacion, tanto boluntarionan y sector priva, pa asina por a realisa e proyecto. Banda di esaki ta pidi comunidad pa sigui duna un man na e fundacion pa asina nan por sigui brinda nan clientenan un bon servicio.