Durante tratamento di e ley riba e refineria di Aruba y CITGO Minister di Labor drs. Paul Croes a mustra cu durante 2 termino di Gabinete Mike Eman, desempleo a wordo reduci for di 12% na 2009 pa 5% pa 2017. Esaki ta un reduccion hopi grandi cu mas di 50%. Mas hende a logra haya trabou bou di e Gobernacion aki. Poco paisnan por logra algo asina significante. Minister di trabou Paul Croes ta premira cu pa 2017 dor di e reapertura di e refineria di Aruba cu e cifra por asta baha bou di e 5%. “Cu un maneho eficas dedica na yuda nos yiunan di tera cu un trabou den e sector di e refineria y tambe otro sectornan mi ta premira un reduccion ainda mas grandi den e cifra di desempleo. Yiunan di tera ta prome pa bin na remarke pa un trabou den e refineria. E cantidad di cuponan di trabou cu lo mester wordo yena pa localnan y despues pa personanan di afo. Durante periodo di e reconstruccion di e refineria ta spera 2500 pa 3000 cupo di trabounan cu lo habri. Esaki ta un impacto importante pa e mercado laboral”, Minister Paul Croes a bisa den su discurso den Parlamento di Aruba. E reduccion di desempleo aki tambe ta danki na esfuersonan di Gabinete Mike Eman ll pa sigui inverti den nos pais. Proyectonan manera e Green Corridor, Hospital nobo, Haf di Containers na Barcadera, renobacion di un cantidad di scol y proyectonan comercial stimula for di maneho di Minister di infrastructura a contribui grandemente cu e nivel di empleo di Aruba a keda manteni. “Den dos periodo di Gobernacion nos a logra reduci gastonan di Gobierno, a logra recuparacion economico y a reduci desempleo for di 12% pa 5%” esakinan ta cifranan real y macro economico cu nos a logra pa nos pais”, Minister di Labor drs. Paul Croes a mustra.