Durante un entrevista na radio, Minister di Labor, drs. Paul Croes a splica, den forma detaya, con ta atendiendo cu e cuponan di trabou na CITGO, con e sistema ta traha pa duna Arubianonan prioridad. Tambe a anuncia cu pronto CITGO Desk ta bay habri finalmente na sede di Postkantoor San Nicolas.
“Regeren is voortuit zien,” e mandatario a comenta y den cuadro di esey a prepara for di luna di Januari ultimo pa yuda e trahadronan local. Na CITGO Desk virtual, esta pa medio di telefon y email, a ricibi mas di 700 peticion di trabou. Tambe tin e hendenan cu a acerca personalmente.
Lamentablemente a haya obstaculonan pa cu e renobacion di espacio den ex edificio di DOOV y door di esey no por a ricibi mas hende. Esey a keda soluciona y ta premira cu den dos siman of menos lo por cuminsa atende hende cu nan CV na sede di Postkantoor na San Nicolas.
E meta tras di CITGO Desk ta pa centralisa e informacion y no laga espacio pa otro hende abusa. Tin oficinanan cu a lanta y tabata cobra 250 Florin pa recapacitacion, actonan ilicito cu propio Minister Croes a denuncia di biaha. Tambe tabatin politico cu a anuncia cu ta cuminsa cu un desk. Esey no ta yuda ya cu hustamente kier tin tur persona disponibel den un solo luga pa asina por combina cada trahado cu e cupo habri.
A haya Arubianonan caba cu actualmente ta na Vietnam, Trinidad, Saudi arabia, Surinam, Qatar, etc. cu kier bin bek nan isla natal pa contribui na e proceso nobo aki. “Nos mester saca e miho probecho y pesey mi ta conseha tur e interesadonan pa pone e prioridadnan corecto, ta motiva, responsabel, prepara pa asina finalmente por tin un stabilidad financiero pa bo y bo famia,” Minister Croes a bisa.