“Awe nos isla Aruba ta uni na resto di mundo pa conmemora un dia masha importante, esta Dia International di Derechonan Humano. E hecho cu no tin un ceremonia of otro tipo di celebracion mas prominente ta muestra cu hustamente nos, como pais, ta respeta enormemente e esencia y ta goza di su existencia,” asina Minister di Asuntonan Social, Hubentud y Labor, drs. Paul Croes a comparti como reflexion. “Sin embargo, ta precisamente ora bo por bisa di ta goza di un situacion sano den bo sociedad, e responsabilidad mester ta enfoca riba e defensa di esnan indefenso y esey ta loke nos mester corda awe,” e Minister a señala. E pensamento ta cuadra cu e yamada cu Nacionnan Uni ta haci.
Dia di Derechonan Humano ta celebra tur aña riba dia 10 di december paso ta riba e dia aki, bek na 1948, e Asamblea General di Nacionnan Uni a aproba e Declaracion Universal di Derechonan Humano. Ta e responsabilidad di nos tur pa defende derechonan humano. Cada un di nos mester tuma un posicion y esey riba su mes ta un stap dilanti.
Derecho di refugiado of imigrante, di personanan cu limitacion, di e comunidad LGBT, di hende muhe, di Indigena, di mucha, of cualkier otro persona cu ta core e riesgo di wordo discrimina of sufri un acto violento.
“Defende e derechonan humano ta na interes di nos tur. E respeto pa derechonan humano ta promove e bienestar di hende, e stabilidad di sociedad y e harmonia di mundo cu awendia ta mas conecta cu otro cu nunca,” tabata e palabranan di Secretario General di Nacionnan Uni, Ban Ki Moon.
Minister Paul Croes ta duna su apoyo na e mensahe aki y ta urgi cada miembro di nos comunidad pa balora e libertadnan cu e respeto di nos derechonan humano ta brinda nos, pero tambe para solidario na momento cu esun di nos prohimo ta wordo viola. Hunto nos ta haci e diferencia.