Minister Paul Croes cu bon noticia: Cambio di ley ta reduci “beslag” riba salario minimo te cu 10 por ciento

Diahuebs pasa durante continuacion di e reunion di Parlamento pa loke ta trata cambionan den e Codigo Civil (BW), Minister di Labor y Asuntonan Social, drs. Paul Croes, a informa cu un di e cambionan importante cu lo tuma luga, ta pa duna personanan cu tin salario minimo como entrada, un alivio unda nan por paga debenan atrasa, sin wordo perhudica hopi ora cu presenta un caso di “beslag” of retencion di salario.
Manera ta e caso na e momentonan aki, Minister Paul Croes a splica Parlamento, un persona cu salario minimum cu pa cualkier motibo no por cumpli cu un fiansa of otro tipo di debe cu el a tuma, ora cu esunnan interesa pone “beslag” riba salario di e persona aki, e beslag ta di 30% di su salario cual ta manera ley ta prescribi na e momentonan aki.
Pa duna e personanan cu minimumloon un espacio pa cumpli cu pago di su debe y tambe keda cu placa pa por sigui dilanti den su bida diario, a dicidi cu lo introduci un aspecto nobo den e ley caminda esunnan cu ta gana salario minimo, lo haya nan mes confronta cu un “beslag” solamemte di maximo 10%, locual ta laga e persona cu suficiente espacio financiero pa sigui dilanti y soluciona su problema financiero.
Na mes momento e cambio di ley ta mustra cu pa esnan cu tin un entrada te cu 50 mil Florin pa luna, si nan haya mesun problema pa cumpli cu pago di un of otro debe, e ley nobo ta stipula cu lo por pone “beslag” te cu 25% di su salario na luga di e 30% cu tambe ta brinda e hendenan aki mas espacio pa maniobra cu nan placa.
Pa hendenan cu ta gana un salario di riba 50 mil Florin pa aña esaki lo keda mesun cos manera e ley actual ta stipula, cu ta un “beslag” te maximo di 30% di su salario.
Minister Paul Croes a mustra cu sin duda e cambio aki ta masha importante pa esunnan cu tin un salario abou por recupera di e situacion cu nan a haya nan mes aden, cumpliendo cu nan obligacion sin cu esaki ta hinca nan den un situacion mas dificil economicamente cu loke ya nan ta pasando aden.
Un cambio cu sin duda a ser ricibi cu hopi entusiasmo ya cu esaki ta brinda mas alivio pa esunnan cu a bin haya nan mes den e tipo di situacionnan aki.

Comments

comments