Minister Paul Croes ta sumamente contento cu e enfasis positivo cu Feria Social a trece cun’e pa cu nos hobennan y nan aporte pa comunidad. Den e caso aki Minister Croes ta gradici Stichting Rancho pa habri e oportunidad pa hunto cu Feria Social y Cede Aruba por a haci algo positivo pa e bario di Rancho. Rancho ta un bario cu hopi historia y cu ta un refleho grandi di Oranjestad, y cu hopi anecdota cu no por bay perdi. Minister Croes tabata tin e honor pa recientemente hunto cu hobennan, stichting Rancho y Cede Aruba, haci apertura di “Hanchi Kalki”. Esaki ta un di e diferente hanchinan den Rancho cu lo haya atencion y asina purba na trece lo miho di e bario na luz di dia. E proyecto aki ta uno exitoso cu a trece e hobennan hunto pero tambe a uni e bario pa asina mustra e parti bon di e bario. Ehecutando e proyecto aki, kier mustra cu aunke e bario por tin algun problema social, e bario tin hopi cosnan positivo pa ofrece. Minister Croes ta sumamente contento cu e proyecto y ta elogia e iniciativa aki tanto di parti Stichting Rancho, pero tambe tur e hobennan cu a haci esaki posibel. Feria Social e aña aki a conta cu un total di 15 fundacion cu a participa y 90 hoben cu boluntariamente a contribui na Feria Social 2.0. Minister Croes ta gradici un y tur cu a haci esaki posibel, tanto NGO’s , comerciantenan, Cede Aruba y tur hoben cu a contribui. Pa por a haci Feria Social e aña aki un biaha mas asina exitoso, a logra recauda Mas di 200 mil florin pa e proyectonan di cada fundacion den nos comunidad. Feria Social a demonstra di ta un proyecto sumamente positivo pa nos comunidad pa cual rason Minister Paul Croes Ta spera cu e proyecto aki ta uno cu lo continua den futuro.