Minister Croes ta sumamente contento cu un biaha mas campaña di prevencion di abuso di mucha a inicia. Manera un y tur sa, e topico di abuso di mucha ta uno cu cada biaha ta keda treci dilanti como un di e tematicanan mas preocupante den nos comunidad. Inicialmente a cuminsa cu un campaña riba medionan social conoci como #STOPAWO. Un campaña cu a bay viral y cu hopi hende a sostene demostrando asina cu nan tambe ta contra tur tipo di abuso di mucha, sea fisico, verbal, emotional of sexual. E siguiente aña comunidad a papia riba e topico aki y a scohe pa sigui cu e campña preventivo di #STOPAWO pero e biaha aki den un forma mas organisatorio y administrativo. E biaha aki, 17 organisacion den e tereno social a uni forsa pa asina cada un por sa nan function y rol den e cadena di cuido, educacion, salud y proteccion di nos muchanan. E forma di cooperacion aki pa prome biaha a wordo alcansa, cual ta algo cu Minister Croes ta kere ta un paso hopi grandi den mehoracion di cuido di nos yiunan. Banda di esaki, a inclui mucha tambe den e campaña, na unda Aña pasa tabata tin alrededor di 500 mucha cu a participa den expresa kico nan derechonan ta. E aña aki Minister Croes ta sumamente contento mirando cu e cantidad di mucha cu a participa na e camaña aki a bira dobel, na unda e biaha aki a conta cu alrededor di 1000 mucha. E hecho aki ta uno cu Minister Paul Croes ta considera hopi importante como cu den su pensamento, derechonan di mucha ta cuminsa na nan mes, e muchanan mester ta conciente di nan derechonan, cu nan ta biba riba un pais cu ta respeta nan derechonan y por medio di e campaña aki, tur esaki ta posibel. Pa finalisa Minister Croes kier a gradici tur esnan cu ta contribui di un of otro forma pa mustra nos muchanan kico ta nan derechonan.