Diahuebs y diabierna anochi a tuma luga na Cas di Partido AVP un serie di seminarionan dirigi na profesionalnan hoben riba temanan manera democracia, constitucion, estudionan social Cristian y tambe responsabilidad civico, entre otro. Como hoben politico cu un carera ehemplar, Minister Paul Croes a fungi como orador tocando e tema di ‘Funcionamento di Gobierno.’ E mandatario a califica e encuentro como un anochi hopi informativo y ameno y sigur algo nobo atrobe cu ta organisa pa hobennan profesional interesa den tur aspecto di politica y gobernacion.
“Nos a mustra basicamente kico ta guia e decision di un gobernante y tambe a duna informacion riba Parlamento. Mi ta kere cu ta un iniciativa hopi positivo y cu mester continua,” asina Minister Croes a comenta. “Ora cu kier interesa hobennan pa drenta e arena politico, ta importante pa e personanan aki conoce tambe kico ta encera politica, gobernacion, con nos staatsregeling ta hinca den otro, con nos estado di derecho ta funcion pa e ciudadano.”
E Minister, kende a crece politicamente den partido AVP y a bira cu su 33 aña, e Presidente di Parlamento di mas hoben den historia di Aruba, ta kere cu ta importante pa repasa e principionan social Cristian y Cristian democrata. “Bo ta bay bek na e fundeshi di bo ideologia y riba esaki bo ta keda construi futuro, pensamentonan y plannan.” Minister Croes ta contento di wak asina tanto hoben interesa pa un presentacion importante asina ya cu ta demostra cu tin interes den politica. A gradici tambe otro oradornan manera Profesor di Universidad Rycond Santos do Nascimento y Luc Alofs pa nan contribucion valioso.
