Riba dia internacional di personanan cu limitacion Minister di Asuntonan Social drs. Paul F.T Croes tabatin un mensahe central. “Ban kibra e taboo y berguensa pa atende cu personanan cu limitacion. Nan ta igual na cada uno di nos y merece un bida digno”, minister Paul Croes a expresa. Durante e siman tras di lomba e Minister a dedica na varios di e organisacionan cu ta dedica na cuido y apoyo di e grupo aki. Tambe Minister Croes a mustra riba su meta di mas participacion di personanan cu limitacion den tur sector di nos pais. Participacion ta keda central den bista di Minister Croes. Tur persona cu limitacion mester tin e oportunidad y e derecho di keda trata igual cu tur otro persona den nos comunidad. E meta aki ta un di e prioridadnan di e Minister en cuestion for di comienso y cu sin duda algun, cu dunando e grupo aki e atencion, dedicacion y perserverancia necesario, lo logra na haci e meta aki realidad. Aruba ta conta cu alrededor di 8000 persona cu algun tipo di limitacion den nos sociedad. Minister Croes ta convenci cu Personanan cu limitacion ta forma un parti importante di nos comunidad y cu apoyo y sosten di un y tur lo logra di integra e grupo aki exitosamente den tur sector di nos pais.