Minister Paul Croes a anuncia: Mas di 1.4 miyon adicional pa bringa abuso di mucha

Minister Paul Croes a anuncia cu 1.4 miyon Florin a bin riba presupuesto 2017 pa e lucha contra abuso di mucha. E mandatario encarga cu proteccion y cuido social di mucha, a haci e anuncio aki diahuebs ultimo den Parlamento, durante e tratamento di Codigo Civil.
Manera ta conoci, Presupuesto 2017 ta bin pronto na turno pa wordo trata tambe pa e instancia mas halto di nos pais. E suma aki ta destina pa personal profesional den e ramo di abuso di menor. Ta trata di personal manera psicologo y trahadornan social cu ta apoya e cadena di cuido y proteccion di nos muchanan.
Cu e anuncio aki Gobierno di Aruba ta duna oido tambe na e preocupacion den e tereno social pa apoyo di e sector. Instancianan cu ta bay ricibi e apoyo aki ta Departamento di Asuntonan Social, Bureau Sostenemi, Imeldahof, Fundacion Pa Nos Muchanan y tambe Fundacion Pa Hende Muher Den Dificultad.
A presupuesta e suman aki pa e aña fiscal 2017 wardando e aprobacion di Parlamento di Aruba. “E suma di 1.4 miyon sigur ta un apoyo enorme pa e lucha contra abuso di mucha na Aruba. Di e forma aki ta ekipa departamentonan cu personal capacita pa asina e cuido, salud y proteccion di nos muchanan ta garantisa. Tambe esaki lo yuda un servicio mas rapido y eficiente den momento di casonan di abuso,” asina Minister Paul Croes a indica.

Comments

comments