“Sumamente exitoso e Feria Social 2.0 a resulta di ta pa 2016. Un total di 93 hoben boluntario a apoya no menos cu 15 fundacion social di nos pais. Esaki den nan tempo liber, demostrando asina cu hobennan di Aruba ta haciendo cosnan positivo pa nan pais”, asina Minister Paul Croes a comenta den un entrevista na final di Feria Social 2.0. E final di Feria Social a tuma luga den un Fort Zoutman completamente yen cu un publico grandi. Cada proyecto a keda presenta individualmente y publico tabata impresiona pa e trabou desplega pa nos hobennan como boluntario hunto cu nan Youth Coaches.
Minister Paul Croes kende ta e motor tras di e proyecto nacional di participacion di hubentud na fundacionnan social, a mustra hopi satisfaccion cu e resultado final. “Cu 93 hoben ta pone nan tempo liber pa dedica na apoya y yuda fundacionnan pa logra un proyecto, ta mustra liderasgo di parti di nos hobennan. En bes di dedica nan mes na cosnan menos positivo e hobenan aki a dicidi di yuda un otro ser humano y como consecuencia, nos sociedad colectivo”, asina Minister Paul Croes a bisa.
E idea cu Minister Croes a trece dilanti na 2015 tin como obhetivo pa conecta fundacionnan cu un meta specifico, e recursonan necesario for di sector priva y hobennan boluntario, resultando den realisacion di proyectonan na beneficio di comunidad y tambe conscientisacion di nos hobennan den tereno di responsabilidad social y liderasgo. Mirando con Feria Social 2016 a surpasa e expectativanan y ta creando un cultura mas grandi di trabou social, Minister Croes ya caba a compromete pa e programa di participacion di hubentud ripiti den 2017.