A acerca Minister di Labor, Paul Croes, pa haya sa con leu nan ta pa cuminsa trata e ley di Citgo. El a splica cu debi cu tin un preocupacion di parti di e sindicatonan cu tin mas hende di afo cu kier traha na Aruba cu local mes. Un total di 700 persona local y 10 mil hende di afo a solicita pa bin traha den e refineria di Aruba.
E proceso pa e ley na Parlamento ta andando, el a splica. Pa prome cu fin di luna e ley aki lo wordo trata probablemente den Parlamento, pa asina oficialmente anuncia e reapertura di e refineria na Aruba. Ta asina berdad, no solamente sindicatonan a informa esaki, pero como minister encarga cu e aspecto di Citgodesk, hunto cu minister di Energia, a haya rond di 10 mil aplicacion di Venezuela, hendenan di otro pais, cu lo ta interesa pa traha den e refineria, cual ta un candidat enorme. Localmente tin rond di 700 persona cu a solicita den e Citgodesk, caminda nan a manda nan curriculum pa e ambtenaarnan di e Citgodesk. Dentro di poco ora cu anuncia e oficina nobo di Citgodesk na unda cu personanan por bay tambe entrega nan CV, ta personanan cu kisas ainda no tin acceso riba email, ta personanan cu kisas no ta mandando e CVnan online, lo bay entrega esakinan fisicamente. Por calcula cu lo bay haya un aumento den esaki. Loke cu Gobierno ta haciendo pa garantisa cu localnan tin prome opcion pa yega na e trabao, ta juist e introduccion di Citgo Desk. E ta un forma di filtra na momento cu un contratista mester di 50 trahado den diferente sector pa por ehempel ora di renoba un planta, nan pidi 50 trahado di afo, loke ta haci na e momento ey ta match cu e Citgodesk, cu e database di personal local cu tin aki na Aruba prome cu haya permiso pa trece un hende di afo pa por traha den e refineria of como contratista den e refineria.
Banda di esey, Gobierno a introduci un proceso unda cu ta bay trata na hobennan cu ta terminando diferente scol tecnico, EPB, EPI of Openbare Avondleergangen, pa asina nan por haya un certificacion pa por traha mañan den e refineria.