Diadomingo anochi Minister Otmar Oduber tabatin e placer di yama bon bini na e Secretario General di World Tourism Organization, Taleb Rifai, cu a yega Aruba pa forma parti di e conferencia Happiness 360 World Tourism Conference cu lo tuma lugar 13 y 14 di September na nos isla.
Dr. Taleb Rifai lo ta orador principal y lo ta formando parti di e panel na e conferencia mundial aki cu lo trata tendencianan global y sinergia entre turismo, cultura y felicidad di cada nacion.
E invitacion pa e conferencia aki a wordo haci door di Minister Oduber na Dr. Rifai na Medellin, Colombia durante e Asamblea General di United Nations World Tourism Organization (UNWTO). Durante un audiencia cu e mandatario tabatin cu e Secretario General a splike e intencionnan di Ministerio di Turismo pa haci di e Indice di Felicidad parti di e maneho nacional y e relacion di esaki cu ‘Aruba One Happy Island’. Dr. Rifai semper a para tras di e concepto di Indice di Felicidad cual a wordo presenta precisamente door di Minister Oduber na 2014 na Mexico durante e Conferencia di World Tourism Organization, durante cual e tabata orador invita.
Dr. Taleb Rifai for di prome momento a indica cu lo ta un placer pa por ta presente durante e conferencia aki cu lo conta cu presencia di mas di 100 dignatario y delegadonan internacional y cu ta wordo organiza dor di Gobierno di Aruba hunto cu ATA y den colaboracion cu UNWTO.
Durante lunanan a hiba conversacionnan cu UNWTO pa haya e miho periodo pa realiza e conferencia teniendo na cuenta e schedule di e Secretario General, cual ta uno hopi ocupa, specialmente den luna di September cu ta e luna Mundial di Turismo.
Teniendo na cuenta esaki, fuera cu ta un honor pa tin Dr. Taleb Rifai na Aruba, pa por conta cu su presencia den luna di September ta haci’e mas special ainda. Secretario General lo ta na Aruba hunto cu entre otro Alejandro Varela di UNWTO tambe.
Minister Otmar Oduber a expresa cu e a sinti su mes hopi orguyoso di e caliber di e conferencia internacional aki cu lo ta uno sin precedente y uno historico pa nos isla.