Actualemente tin un lista di casi 20 edificio di Gobierno cu no ta den uzo. Minister di Infrastructura y Medio Ambiente Otmar Oduber a informa cu departamentonan DOW y DIP a hinca un plan den otro pa mira kico por wordo haci cu e edificionan aki. Lo fiha un lista di prioridad y lo papia cu cada Ministerio considerando cu ta trata mas di 15 mil meter cuadra di propiedad/edificio di Gobierno cu no ta den uzo na e momentonan aki.
Manera cu recientemente a anuncia, acuerdo a wordo cera y trabounan ya a inicia na John F. Kennedy School. Anteriormente e edificio a wordo bendi cu vastgoed di Aruba Investment Bank, pero na cierto momento no a atende cu presupuesto y contractnan cu ta necesario. Aworaki a logra agilisa esaki, y ya caba e trabounan a cuminsa. Banda di esaki a tuma decision pa drecha ex edificio di Voogdijraad cu ta situa den centro di ciudad, como tambe e edificio di Uncle Louis Store situa na San Nicolas. Considerando cu esaki ta un monumento, a yega na un acuerdo cu monumentenfonds, algo cu a wordo palabra den pasado pero cu no a haya continiudad riba dje. Esakinan ta bira e dos siguiente edificionan cu dentro di un paar di siman (juli en adelante) lo mira diferente trabounan cu ta cuminsa pa prepara pa etrabounan di renobacion.
Gobierno ta sinti cu na e momentonan aki tin un gran cantidad di edificio cu lamentablemente no a percura pa wordo manteni durante añanan. Minister Oduber ta indica cu nunca a pone e punto aki den un presupuesto hunto cu rekisito pa e responsabilidad di mantencion di un edificio keda na e director di cada departamento. Esaki semper a cay bou DOW of DIP meintras cu prome caminda cu ta corta den dje ta e presupuesto di e departamentonan aki. Aworaki Gobierno ta Sali for di e punto di bista cu e ta e responsabilidad di cada hefe di departamento, mescos cu mester tin lessenaar y computer, pa mescos e mester percura cu e edificio tambe ta den bon estado.
Conseho di Minister a tuma e decision recientemente cu desde presupuesto di 2019 cu ya caba ta preparando pe, mester percura pa fondo ta disponibel na cada departmanto pa e materialnan pa haci mantencion. DOW hunto cu DIP lo ta responsabel eora pa e trabounan cu tincu wordo haci, pa asina evita cu ta yega na e punto manera ta e caso actualemnte cu e lista unda cu tin casi 20 edificio di Gobierno bandona.
Gobierno ta doño di 87 edificio, y 20 di nan ta sin uzo cual ta un ‘kapitaalvernietiging’ pasobra e edificionan ta sigui bay atras. Manera menciona mester evita cu e otro edificionan cu si ta den uzo no bay atras door di percura cu nan ta haya e mantencion necesario. Algun ehempel di edificionan cu ta referi na dje cu ta di Gobierno pero cu no ta den uzo ta: ta encera algun hulpbestuurskantoor, ex edificio di DOW, ex Maria Convent Gebouw, Jeuggezondheidszorg, ex Gevangenis Gebouw na Dakota, parti di edificio di polis na Wilhelminastraat y Savaneta cu ta full bandona, ex Ministerio Publico entre otro. Asina un gran cantidad di edificionan cu Gobierno tin den su posicion cu lamentablemente door di no a haya atencion, aworaki no por ta den uzo. Ta papia di un suma di 20 mil florin por lo menos cu mester por wordo haci disponibel den presupuesto di e departamentonan tur aña pa haci mantencionnan necesario na departamentonan pa evita cu despues di keda sin haci nada den transcurso di añanan e lista di casi 20 edificio ta sigui crece.