Recientemente den medionan di comunicacion e discusion di desaroyo di ‘Isla di Oro’ a bolbe lanta cabes. E proyecto aki a cuminsa mas o menos 2 aña y mey pasa. E ta un proyecto cu e mundo di Turismo ta sostene y mi mes como Minister di Turismo anterior a sostene e proyecto aki, hunto cu AHATA entre otro, Minister di Infrastructura y Medio Ambiente Otmar Oduber a splica. ‘Di e tempo ey caba nos a mustra cu mientras cu e proyecto ta fit den e erea (naturalesa y medio ambiente), e lo sigui carga e soten di Gobierno, manera cu tabata e caso den Gobierno anterior y den e Gobierno actual tambe. Locual a sosode na caminda ta, cu na cierto momento e desaroyadonan a amplia nan vision pa desaroya e area y a presenta un version di 3 biaha e tamaño inicial durante un conferencia, cual a causa gran panico. Inmediatamente despues di e sucedido aki, a acerca e desaroyadonan y a mustranan cu nan mester bay bek na e version cu nan a presenta inicialmente. Minister Oduber a sigui splica cu e desaroyadonan a acepta esaki y nan a indica esaki publicamente, cual ta pa desaroya 60 unidad.
E tempo ey a haci esfuerso pa inventarisa cu diferente NGOs (organisacionan no gubernamental) pa haya sa kico nan inkietudnan ta encera, pa cual mester bisa cu a stipula condicionnan teniendo na cuenta e diferente inkietudnan aki, cu e desaroyadonan mester tene na cuenta si ta bay desaroya e area.
Pa loke ta e Ruimtelijk Ontwikkelingsplan (ROP) lo cana e proceso manera mester ta pa por acomoda tres fase importante den e proyecto aki, cualnan ta (1) proteccion di mangrovenan cu ta forma parti di e 16+ areanan protegi, (2) Desaroyo di Marine Park cu ta bezig cun’e y cual parcialmente ta encera cay den e area aki tambe, y (3) tambe ta bezig cu expertonan pa percura cu balornan di naturalesa wordo manteni den combinacion cu desaroyo economico.