Minister encarga cu Infrastructura Otmar Oduber durante su bishita pa mira e progreso di e trabounan andando na Carnival Village a splica cu durante di e ultimo simannan segun e trabounan ta concretisa hendenan cu bishita San Nicolas ta haci pregunta y por admira e joya aki na San Nicolas. E trabounan lo ta tumando luga den diferente fase, por mira e mural, fontijn y ticket booths cu ya ta casi cla. Despues di e periodo di Carnaval di biaha lo sigui traha riba e kiosconan, bañonan, lo traha un stage tambe. Asina brindando e facilidadnan pa e Carnival Village por wordo uza na mucho mas ocasion!
‘Algo cu a pusha hopi pe considerando e celebracion di Carnaval 65, ta pa duna honor na tur esunnan cu a gana Calypso y Roadmarch den pasado cu lo wordo poni riba e mural cu ta e cara di Carnival Village. Den e proceso aki ta gradici organisacion Musica, SMAC y tur otro persona cu durante añanan a contribui grandemente, sea ta cu transmision di e festivalnan, potret y diferente raportahe y cobertura.’
Adicionalmente Carnival Village den futuro lo ta hopi mas vibrante y activo, esaki a inicia ya desde cu e parada di autobus a bin na e sitio. Awor cu e desaroyonan cu ta na caminda, e chauffeurnan y esunnan cu ta baha y subi bus pronto lo tin un sitio similar na Linear Park unda por relaha y refresca manteniendo e autenticidad di San Nicolas. ‘Hopi trabou ta tumando luga, si bishita e sitio mainta ya pa anochi por mira cambionan drastico y henter e fin di siman aki lo bay sigui cu e trabounan,’ Minister Oduber a enfatisa.
Minister encarga cu Cultura Xiomara Ruiz – Maduro tambe ta sostene e proyecto aki grandemente y a sostene di inicio. Desde cu infrastructuralmente a bisa cu kier haci di Carnival Village un sitio unda cu diferente entretenimento por tuma luga durante henter aña y un sitio caminda cu comunidad por haci ehercicio y relaha cu famia. Aworaki mas y mas por mira cu ta realisando e plan pa haci Carnival Village un centro na San Nicolas cu multiple funcion!
Aña pasa a ricibi aprobacion di Parlamento pa aloca e fondonan pa e proyecto aki realisa y 5 luna pasa caba a inicia cu e trabounan. Minister Oduber ta gradici henter e team di DOW y Ministerio di Infrastructura cu a traha duro durante e ultimo lunanan. Tambe e contratista Freman cu a brasa e proyecto y ta realisando e cu amor, reconociendo e importancia di e proyecto pa San Nicolas y henter Aruba.