Despues cu Ministerio di Desaroyo Teritorial, Infrastructura y Medio Ambiente conhuntamente cu Departamento di Infrastructura y Planificacion (DIP) a anuncia na maart e maneho nobo di peticion y otorgamento di tereno, e sosten di comunidad ta uno remarcabel. Comunidad a demostra su confiansa den introduccion di un maneho transparente, eficiente y facil. Minister Oduber conhuntamente cu Team di Maneho di DIP ta na altura cu tin un lista di espera cu ta data for di añanan ’90. E prome fase di e proceso ta pa actualisa internamente e maneho nobo pa asina por continua cu actualisa e datonan di peticionnan di terenonan. DIP ta for di punto di bista cu e no ta un fabor di pais Aruba pa duna tereno, pero e ta un derecho di cada ciudadano Arubiano pa por tin su propio tereno y construi un hogar. Mas cu claro tin rekisitonan cu mester cumpli cun’e pa por wordo otorga un tereno.
For di e punto di bista cu tur hende tin derecho di yega na nan propio cas, e proposito di DIP y di Ministerio di Desaroyo Teritorial, Infrastructura ta pa logra mehora calidad y cantidad di viviendanan social pa asina cumpli cu e necesidad social pa cu vivienda. DIP lo tin un contribucion integral den esaki pa cumpli den otorga terenonan pa proyectonan di cas social of casnan economico.
Pa garantisa y sigura viviendanan social segun demanda na un manera eficiente, eficaz y corecto:
1. FCCA lo ta como partner mas involucra cu maneho di vivienda pa contribui mas na su meta principal na construccion di viviendanan social pa gruponan special di nos comunidad.
2. Lo inclui otro institutonan financiero y fondonan di pensioen como partner den e maneho di viviendanan social.
3. Lo crea proyectonan cu mas viviendanan social y economico.
4. Lo crea pa areanan di recreacion, naturalesa y facilidadnan pa mehoracion di bienestar y ambiente di bida.
5. Lo stimula pa personanan cu ta huur cas di FCCA, por cumpra y ta doño di nan propio cas door di un contracto di ‘huurkoop’ di FCCA. Adicionalmente, lo trata na rebaha interes di hipoteca.
6. Lo traha pa tur plannan di desaroyo (verkavelingsplannen), inclusivo instincion y extension, tin reserva un promedio di 10% pa viviendanan social y viviendanan economico reparti den e plan.’
Por ultimo DIP ta indica cu e cambio di maneho ta duna un vision mas enfatisa riba bienestar di comunidad den general enbes pa un grupo di hende so. Cu un vision mas sostenibel, transparente y responsabel, por garantisa un miho maneho di peticion y otorgamento di tereno.
Pa mas informacion por yega na DIP pa preguntanan of por bishita www.dip.aw.