Minister di Turismo, Transporte, Sector Primario y Cultura, Otmar Oduber a habri e conferencia di turismo Happiness 360 World Tourism Day Conference. El a elabora riba ‘happiness’. E felicidad y amabilidad cu nos bishitantenan ta keda papia di dje ora cu bishita nos isla Aruba.
Minister Oduber a expresa cu ta un placer pa tin tur hende presente como parti di nos isla su “World Tourism Day Conference” cu e topico ‘HAPPINESS’. Un topico cu semper ta relevante y na moda, for di e sabio King Solomon te na diferente poeta y filosofonan den transcurso di historia, escritornan manera Arianna Huffington y profesional di Harvard y profesornan manera Robert Waldinger kende ta participando den e conferencia pa comparti su conocemento.
“Nan tur a skirbi di e topico ‘Happiness’. Kico e ta? Kico ta haci cada un di nos contento? Kico ta haci nos bishitantenan contento? E palabra ‘happiness’ ta esun corecto? Ami seguramente no tin tur e contestanan pero keda pendiente como cu nos ta bay haya sa e contesta den transcurso di e presentacionnan via di e oradornan”.
Dos aña pasa nos a atende UNWTO’s World Tourism Day Conference na Mexico. E topico na e ocasion ey tabata `Celebrating tourism and community development’. Eynan ta unda cu mi a presenta e Happiness Index, den presencia di Sr. Rifai, kende ta un di e forsanan tras di e forma di midi particular aki. Na mi regreso, mi a dicidi di pone atencion tocante e conscientisacion riba e importancia di midi e exito di turismo basa tambe riba e Happiness Index. A pesar cu e ta un topico na moda, pa Aruba e semper wordo uza, Minister a bisa.
Nos marca – One happy Island – a existi cu algun interupcion, pa casi 40 aña. Nos ta doño di e marca y e ta den nos DNA y nos bishitantenan ta bisa esey tambe. A pesar cu nan ta bin Aruba inicialmente door cu nan ta wordo atrae pa e beachnan magnifico color blauw y nos tremendo tempo, nan ta bolbe bek pasobra nan tabatin un tremendo experiencia y memorianan crea riba nos isla, pero tambe pa e felicidad ‘happiness’ di nos hendenan. Ora cu mi ta papia di bishitante, mi ta papia di crucero y esunnan cu ta keda algun dia, de facto, durante di e conferencia aki, ambos banda lo wordo cubri, Minister Oduber a termina bisando.