Cu hopi orguyo Ministerio encarga cu Cultura ta anuncia e desvelo y vernissage di e obra artistico Lolita cu a tuma luga na Colombia. Lolita ta un obra traha pa artista local Gilbert Senchi y ta cay bou di e vision di Ministerio, cu ta pa promove arte den espacio publico. Esaki lo no por tabata posibel sin e compartimento di vision di Aruba Tourism Authority (ATA), cu a financia e proyecto aki.
Den presencia di diferente persona, no solamente di Bogota, pero tambe personanan cu a bay Colombia specialmente pa presencia e develo aki. Por bisa cu e develo tabata uno hopi emocionante pasobra e yiu homber di Lolita, Luis Cremonie tambe tabata presente riba invitacion di Minister Otmar Oduber. P’e e tabata hopi emocionante pa wak su mama den un develo y den un elogio manera a tuma luga diasabra.
Historia
Lolita Cremonie ta e storia di un hende muhe Afro Caribense cu a lucha pa cria su yiunan, lucha pa bay dilanti y a lucha pa independisa su mes. E storia di Lolita ta cuadra cu e storia di Aruba, unda cu nos Arubianonan a lucha pa ta independiente y a lucha pa tin un voz riba plataformanan internacional. “Esaki ta locual cu Lolita Cremonie kiermen pa nos”. Por cierto, e obra aki ta pone Aruba riba plataforma internacional pasobra e ta e prome obra unda cu un hende muhe Afro Caribense ta wordo reconoci den un forma liber. No den un forma di esclavitud, pero den forma di un lucha pa hiba su famia dilanti.
ATA a financia e proyecto y ARTopia ta maneha e obranan cu Gilbert Senchi ta crea manera e obra aki cual tampoco por tabata posibel sin e vision di Minister Otmar Oduber, encarga cu cultura. Entre esunnan presente tabatin diferente comerciante, grupo di Aruba y e embahador di Hulanda na Colombia Sr. Rodenburg cu tambe tabata sumamente impresiona durante di e desvelo.
Balor pa Aruba
Papiando cu e yiu homber di Lolita a bira mas aparente con simbolico y significativo e storia di Lolita pa Aruba y locual cu Aruba ta representa. Riba medionan social por a tuma nota di diferente hende cu tin storia di nan experiencia cu Lolita, pues e ta un hende cu hopi conoce y cu tin asociacion cune.
E escultura di Lolita ta planifica pa yega Aruba den 4 siman y e localidad cu a palabra cu e escultura lo bin ta dilanti di e oficina di turismo na San Nicolas.
Elogia nos hendenan
E proyecto akinan ta e simbolo pa cuminsa enfoca riba nos hendenan local cu a haci algo remarcabel. E no mester ta esunnan grandi y conoci caba, sino tambe hende comun y coriente den comunidad cu ta contribui na bienestar di nos comunidad. Ohala por tin mas proyecto y ideanan den e forma aki y ta invita partnernan den sector priva pa colabora den e forma aki pa sigui elogia y conmemora nos hendenan cu ta e herment di nos Pais.