Fuera cu nos piernan a ricibi daño, nos beachnan tambe a sufri di e consecuencianan di e mal tempo cu a asota Aruba durante e siman cu a pasa. Minister Otmar Oduber, a splica cu conseho di minister lo bay ricibi un rapport riba nos beachnan, caminda cu dentro di dos siman di tempo, por tuma un accion pa por rehabilita nan.
DOW ta traha cu e compania Deltaris y a base di un trabao cu wordo traha, cu den e proximo dos simannan por tuma un decision y cuminsa cu e rehabilitacion di e beachnan. Minister Otmar Oduber, ta calcula cu ta papia di un suma di mas of menos 2.5 miyon pa 3 miyon florin cu tin cu bay wordo inverti djis pa por prepara of haci un cambio den e forma cu e olanan ta drenta pa e no asota e beach. Esaki ta sin conta e beachnan mes cu tin cu wordo drecha, e palapanan, etc. Tabata tin fondonan prepara, mirando cu tabata planificando caba, pero e situacion ta haci esaki tiki mas erg di loke tabata. Mescos cu a wak tur ploeg sali di biaha, cu man na obra pa nos turistanan cu ta nos “bread and butter” por sigui disfruta di nos beachnan, ta trahando cu positivismo. Ya Hadicurari ta bezig cu manera e olanan baha dentro di 24/48 ora, cuminsa cu e trabaonan eynan y mescos den 2 siman haya un rapport riba e beachnan y drecha esakinan tambe. E pier di Hadicurari ta esun cu mas a haya golpi, pero tin na San Nicolas tambe a ricibi daño y tambe na Barcadera, cu a ricibi minimo daño. Mayoria di e golpi tabata na Noord.