Pa loke ta trata extensionnan di permiso pa turista, como tambe garantianan cu ta wordo pidi pa hendenan di exterior, segun Minister di Turismo Oduber, ta haya fastioso y jammer, ta referi cu ta manera e turista ta esun cu ta haci e peticion aki. A bisa na diferente ocasion, den caso di un garantia, no ta e turista ta haci e peticion. No ta e turista den e caso aki, ta esun cu ta firma e garantia aki. Por ripara cada biaha ta purba di referi cu como si fuera pa motibo di turistanan cu ta keda atras, lo por tin criminalidad, etc. Segun Minister Otmar Oduber, na prome luga, un hende cu ta pidi un garantia, ta un hende cu ta biba na Aruba, cu ta local, of ta biba di un forma legal na Aruba y ta haci e peticion na un departamento di Gobierno, cu ta cay bao di ministerio di husticia. Ora cu ta otorga e garantia, no ta e turista a firma pa haya un carta di garantia. E minister a splica cu e ta contento cu awor aki ta wordo bisa naturalmente cu lo ta mas streng riba e aspecto aki, pero pa cada biaha referi como sifuera cu ta e turista ta culpabel cu un hende ta para garantia pe, of ta culpabel pasobra un carta di extension ta wordo brinda na un persona cu a drenta y a keda mas cu e tempo cu el a bin como un turista, atrobe ta responsabilidad di e departamentonan cu ta firma esaki.
Den e caso aki tin Dimas, cu ta firma pa extension di hendenan cu ta bin y kier keda mas cu e tempo cu nan a haya for di imigracion pa keda na Aruba y di un otro banda, hendenan cu ta haya carta di garantia tambe, ta cay bao di Huridische Zaken (DBJZ), cu ta duna e carta di garantia aki pa hende por keda aki na Aruba.
Minister Oduber a comenta cu tin cu keda corda na final, cu ora cu ta generalisa, tanto e mercado Venezolano, tanto e mercado Colombiano, ta keda mercadonan importante pa pais Aruba. Esun Venezolano ta keda nos di dos mercado principal. Ta keda ricibi entre 140 y 160 mil pasahero for di Venezuela, cu no ta e pasahero ey, cu tabata bin antes pa raspa un carchi, no ta esun cu ta bin haci e cosnan robes, si en caso nan ta wordo haci door di nan. Tin ta wordo papia di un cantidad di 15% di e actonan criminal cu ta wordo cometi door di Venezolano. Pregunta ta, ken ta e otro 85%, cu ta keda di wordo contesta di un banda. Tin cu corda cu den tur maneho y un biaha mas e minister ta bay di acuerdo cu a wordo treci dilanti door di minister di husticia, mester ta mas rigido, mester tin mas control definitivamente pa no bay haya un cantidad di persona di cual nacionalidad cu e ta,keda atras den nos comunidad, pero mester keda corda semper cu e medaya tin dos banda.
Un di e bandanan ey, ta loke ta participa, ta sostene e economia di pais Aruba. Venezuela ta keda e di dos mercado principal keto bay di Aruba. Pa mas di 30 aña a haci bon uzo di e participacion di e mercado Venezolano na Aruba. Cu un bon control, cu un bon colaboracion entre tur e diferente ministerionan, mester sigura en berdad cu nos fronteranan, caminda cu principalmente mester tin bon ekipo, bon control, caminda ora cu hende drenta, por haci un bon screening di ken ta drenta y mester tin un mecanismo na su luga, ora cu un hende a overstay na Aruba, cu mester por sa unda nan ta kedando y con ta yega na nan, e minister a splica.