Minister Otmar Oduber a reuni cu operadornornan di taxi y bus tour cu tin permiso pa opera na San Nicolas y cu tin e deber pa termina na San Nicolas. E permisonan aki a wordo otorga algun tempo atras caba, sinembargo pa motibo di desaroyonan cu tabata tumando luga na San Nicolas a permiti nan pa haci uzo di otro rutanan. Sin embargo aworaki si a pone cu pa e luna cu ta bin DTP lo cuminsa controla pa esaki.
Cu e tour busnan y bond di taxinan presente a duna informacion di oficina di turismo y di parti Ministerio cultura, Departamento di Cultura y Fundacion Museo Arubano (FMA) y otronan cu ta ubica na San Nicolas e momentonan aki. E infromacion tabata riba e rutanan cu ta wordo crea y material di promocion cu ta geprint, mapanan di San Nicolas cu ta identifica tur e centronan di atraccion pariba di nos isla y ehempelnan di con ta crea un tour completo for di playa pa San Nicolas etc.
Rij na waf pa San Nicolas
Oficina di Turismo y Departamento di Transporte Publico (DTP) a reuni cu Aruba Ports Authority (APA) pa pone un rij special na waf pa tur e busnan cu tin rumbo pa San Nicolas. Segun Minister Oduber no solamente esunnan cu tin ruta specificamente San Nicolas, pero otronan tambe cu tin ruta habri cu kier traha e ruta di San Nicolas ta bay wordo permiti pa uza e liña aki.
Esaki ta encera cu na e momentonan aki lo tin acuerdo di atraccionnan cu tin caba den e centro di San Nicolas despues cu a renoba Promenade, museonan habri, Cosecha tin artesanonan y benta di artesania local. Pues aworaki ta e momento pa cuminsa hiba e turistanan Pariba, cual lo sosode atrabes di e permisonan cu a wordo duna. Como tambe e campaña cu ta bay wordo hiba pa oficina di turismo prome cu turista bin riba Aruba.com, pero tambe atrabes di flyers y brochure cu lo wordo duna na aeropuerto. Pa di e forma aki nos por cuminsa atrae e bishitantenan pa e parti Pariba di nos isla y laga nan conoce e desaroyo cultural mientras ta sigui desaroya pariba di nos isla.
Meta
E meta ta, cu dentro di 1 pa 2 aña ora cu haya mas interes “ripple effect” cuminsa funciona, lo haya souvenir shopnan ta cuminsa habri, ta mira mas F&B, mas restaurant local habri Pariba di nos isla etc. Kier mira por lo menos 200 – 250 mil bishitante (segun calculacionnan) cu mester por bishita San Nicolas cu lo crea un base e ora pa sostene e desaroyonan cu ta premira cu mester tuma luga na nos Culture & Heritage City, Minister Oduber a termina bisando.