Segun minister di energia, Utilidad y Asuntonan Economico, Mike de Mesa, PDVSA tin su problemanan financiero, pero esey no ta stroba pa Citgo opera normal na Aruba.
E mandatario ta sigui splica cu Refineria di Aruba tin un acuerdo cu Citgo. Citgo ta un American Based Company, cu ta registra na Delaware, Merca y e ta cay bao di ley Mericano. Cu nan tin un acuerdo. E ta un hecho si cu Citgo ta relata tambe cu PDVSA. PDVSA na fin di dia ta e shareholder di Citgo. Pero esey ta los di e hecho cu su regimen di ley ta cay bao di Merca. E ta un compania registra na Merca. Citgo Aruba tambe ta cay bao di e compania madre di Citgo Corporation, cu ta registra na Merca, cu ta PDV Holding. Ta cu Citgo en berdad Aruba tin un acuerdo.
E minister no ta descarta cu PDVSA tin su retonan financiero. Tur rond di mundo tin hopi corporacion grandi cu tin retonan grandi financiero y PDVSA den esaki ta un di nan cu ta conoci cu tambe tin su retonan, con grandi nan ta of kico ta e detayenan di dje. Esey ta loke cu e minister mester saca e informacion ey, mescos cu tur hende ta sak’e, di un manera of otro for di medionan di comunicacion. Ora cu papia cu e ehecutivonan di Citgo, nan ta splica e diferente retonan, ora cu ta papia cu e presidente di PDVSA, kende ta splica su punto di bista. E ta dificil pa haya tur e detayenan interno. Pero cu nan tin reto, nan tin reto tambe.
Pais Venezuela ta e pais singular cu reservanan di azeta mas grandi na mundo. Tur e paisnan Arabe, si tuma nan singularmente, Venezuela tin mas azeta cu nan. E ta un hecho cu Venezuela tin reservanan sumamente grandi pa hopi aña di azeta. Pa gas tambe nan tin reserva grandi no mucho leu di Aruba. E lot eynan na 2009 nan a haya un di e reservanan di gas mas grandi den historia di Caribe. E ta en berdad un reserva sumamente grandi. Ta un pais cu hopi reserva di mineral. No solamente azeta, pero carbon, diamante, oro y diferente otro tipo di locual nan ta yama metalnan precioso. E ta un pais sumamente rico na diferente reserva mineral.
Si mira e analisis y ratingnan cu ta wordo haci di Citgo, por ehempel internacionalmente, ta mira cu e ta un compania stabil y grandi, cu ta cay bao di e regimen di ley Mericano comercialmente tambe. Ora cu mira PDVSA mes, ta un di e companianan sumamente grandi na mundo. Tin un tempo cu nan tabata un di e top 3 of 4 mundialmente. Cu awe tin su retonan, ta un hecho y ningun hende por bisa cu esey no ta e caso. Ta asumi cu ta trata di deal cu e situacion ey. E situacion ey directamente no ta relata na nos como pais, como Gobierno. Cada pais tin su mesun retonan internamente cu e ta deal cu ne. Por mira cu riba mercado Internacional nan ta bezig y ta dificil pa saca un conclusion di esey. Por mira si cu nan ta andando pa refinanciamento di nan fiansanan cu nan ta bezig cu esey. Tin diferente informacion, segun de Meza.